Апас районында «свидание» вакытында иске мәктәпне яндырганнар

13 декабрь көнне Апас районы Көлкәш авылында иске мәктәп бинасына кызыл әтәч үрмәли. Авыл халкы сөйләвенчә, моңа «свидание» үткәрергә кергән егет белән кыз гаепле. – Бу – 1891 елгы Сәетша Җиһаншин исемле кешенең йорты, – ди Кызыл-Тау авыл җирлеге башлыгы сәркатибе Алсу Гыймранова.

– Хуҗалар вафат булгач, өйне икегә бүлеп, бер ягын фельдшер-акушерлык пункты, икенче ягын башлангыч мәктәп итеп файдаландылар. Дистә елга якын кулланышсыз торды ул, авыл җирлеге балансында түгел. Уты-газы да юк, рәшәткәләре дә искереп беткән, капкасы да терәлеп кенә тора. Йорттан төтен күтәрелү хәбәрен миңа мәктәпнең каршы ягында торучы Баһавиевлар шалтыратып әйтте. Янгын сүндерү машиналары тиз килде. Өйдә төнлә яшьләр булган диләр. Алар, күрәсең, җылыну максатыннан ут куллангандыр. Ут чыгуга тәмәке төпчеге гаепле дигән вариант та бар. Бәхеткә, зур зыян килмәде. Без килгәндә өйнең эчен кап-кара төтен баскан иде. Пластмасса янган ис таралды. Стеналарына ут үрмәләргә өлгермәгән. Идәннең кайбер урыннары кара көйгән иде.

Мәктәп бинасыннан төтен күтәрелүен, әйткәнемчә,  шушы урамда яшәүче Баһавиевлар күрә.

– Ул бина безнең каршы якта, сулдарак урнашкан, – ди Мәмләкәт Баһавиева. – Ирем күршеләргә кергәндә, өй морҗасыннан чыккан төтенгә игътибар иткән. Кеше тормаган йорттан төтен күтәрелү бик сәер. Ирем тиз арада шунда йөгерде. Ул барганда өй эче кара төтенгә тулган була инде. Аяк эзләре юк иде. Янгын сүндерү машинасын чакырттык. Баштарак монда кереп, аулак өй ясаучы безнең улыбызмы икән әллә дип шикләнгән идек. Тик аның ул төндә Апаста булуы ачыкланды. Ишекләре ачык тора инде аның, кем тели шул керәдер. Үзем алай кергән-чыккан кешене күргәнем юк. Җәен бакчасыннан балалар алма ташый.

Янгын турындагы хәбәр Урта Балтай янгын пост-депосына иртәнге 9нчы яртылар тирәсендә керә. Янгын сүндерүчеләр моны «төтенләү» дип кенә бәяли. Өч квадрат метр мәйданга зыян килгән.

Апас һәм Кайбыч районнарының янгын күзәтчелеге бүлеге җитәкчесе Илдар Вәлиев иске мәктәп бинасында ут тәмәке төпчегеннән чыккан дип саный.

– Хуҗасыз бинага яшьләр җылыну максатыннан кергәннәр. Тәмәке төпчеген сүндерергә онытканнар, күрәсең, ул кәгазьләргә үрмәләгән. «Гаеплеләр» егет белән кыз, икесе дә балигъ булган, 21яшьтә. Әлеге  мәсьәләне районда планеркада күтәрдек. Бинаны сүтәчәкләр, – диде ул.

Егет белән кыз үз гаепләрен таныган. Әмма аларны җавапка тартып булмый. Чөнки җавапка тартыр өчен, бинага зыян килергә тиеш. Элеккеге белем бирү учагы бәлки әлеге егет белән кызның даими «свидание» урыны булгандыр? Кыз дигәнем, кияүдән кайткан, бала анасы, диләр.