|
|
Бүген кемнәр туган
|
|
Архив
|
20.09.2009 Шоу-бизнес
ШОУ-БИЗНЕС ӘБИЛӘРНЕ ДӘ КЫЗЫКТЫРА26 сентябрьдә Казан дәүләт мәдәният һәм сәнгать университетының концерт залында "Барс-Медиа" продюсерлык үзәге кастинг уздырырга җыена. Үзәк 17-35 яшьлек җырчылар һәм юмор осталарын эзләячәк. Әлбәттә, татар тамашачысы өчен! Шунлыктан чыгышлар татар телендә булырга тиеш. Җырчылардан бер халык һәм бер эстрада җырын башкару сорала. Ә юмор осталарына монолог сөйләп күрсәтәсе. Кастингтан узган иң-иңнәрне оештыручылар үз канаты астына алып, аларга зур сәхнәгә менәргә ярдәм итәчәк. Бу инде продюсерлык үзәге яңа җырлар, яңа клиплар, сәхнә костюмнары, альбомнар чыгаруда ярдәм итәчәк дигән сүз. Татар эстрадасына менү үзенчәлекләре турында "Барс-Медиа"ның генераль продюсеры Гөлнара АБАЕВА белән әңгәмәдән белә аласыз. – Гөлнара, кастинг нинди максаттан уздырыла? Аның быелгы үзенчәлеге нинди?
– Мондый кастингларны без 2004 елдан бирле үткәреп килдек. Татар халкының яшь талантларын барлау һәм аларга үсү мөмкинлекләрен тудыру өчен оештырылган чара бу. Быел да җырчы һәм юмористларны эзлибез. Үзенчәлеге бар дип әйтмәс идем, башка еллардагы кебек, таләпләре дә шундый ук.... Жюрида "Барс-Медиа" продюсерлык үзәге директоры Радик Артемьев, "Татар радиосы" директоры Алмаз Миргаязов, Россиянең һәм Татарстанның халык артисты Венера Ганиева, Татарстанның халык артисты Илдар Хәйруллин, "Юмор шоу" проекты авторы Фәрит Галиев, юмор остасы Әбри Хәбриев һәм мин фәкыйрегез булачак.
– Җырчылардан ике чыгыш сорала икән. Барлык катнашучыны ничек тыңлап бетермәкче буласыз?
– Кастингта ел саен 500-600 кеше катнаша. Инде беренче минутлардан ук җырчыга бәя бирә алабыз. Кайберәүләр икенче җырларын башкарып та тормый. Җырчының сәхнәдә үз-үзен тотышы, тавышы ошаган очракта гына аны тулысынча тыңлыйбыз. Конкурста катнашучылар безгә үпкәләмәсен. Барлык чыгышлар да видеотасмага яздырылып барыла. Кастингтан соң да жюри язмаларны карый, фикерләшә һәм шуннан соң гына катнашучыларга нәтиҗәләрне җиткерә.
– Алдагы еллар тәҗрибәсе нәрсә күрсәтә?
– Кызыклы хәлләр дә булгалады. Узган ел Ленин исемендәге мәдәният йортында узган кастингка 600ләп кеше җыелды. Шунда, ялгышмасам, 76 яшьләр тирәсендәге бер апа чыгыш ясады. Без аңа шаккаттык. Катнашучыларның яше чикләнгән булса да, әбинең кәефен төшермичә генә, аны рәхәтләнеп тыңладык. Кече яшьтәге балаларга кастингта катнашырга киңәш итмәс идем. Әгәр музыка мәктәбендә шөгыльләнә икән, бала, беренче чиратта, укып бетерсен. Кастингтан үтә алмау кичереше балаларга психологик яктан авыр булырга мөмкин. Кәефе төшеп, мин булдыра алмыйм дип, хәтта җырлаудан баш тартуы бар.
– Әйтегез әле, җырчыга продюсер нигә кирәк?
– Беренче чиратта, продюсер кем ул дигән сорауга җавап бирер идем. Продюсер – артистның образын тудыручы, җырлар сайлаучы, альбомын туплаучы, концертларын оештыручы. Җырчы берүзе моның белән шөгыльләнә алмый һәм, гомумән, моңа вакыты да җитми. Җырчыга продюсер аны халыкка таныту өчен кирәк.
– Ә тамашачыга ничек ярарга? Татар тамашачысының үзенчәлекләре бармы?
– Бик таләпчән инде безнең халык. Тамашачыбыз моң ярата, халыкчан җырларны үз итеп тыңлый. Консервативлыгы да җитәрлек. Һәр җырчының үз тамашачысы, һәр тамашачының үз җырчысы булырга тиеш, минемчә.
Айгөл ШӘВӘЛИЕВА |
Иң күп укылган
|