Мин праймеризда катнаша алмадым

Соңгы арада радио да, телевидение дә: “22 майда праймериз була, анда теләгән һәрбер сайлаучы катнаша ала. “Единая Россия” блогыннан үзегезгә ошаган кандидатлар өчен тавыш бирә аласыз”, – дип сөйләп торды. Бу кадәр кыстауга бармый булмас дип, мин дә үз фикеремне белдерергә теләп, сайлау участогына юнәлдем. Мине Урта Көшкәт авыл җирлеге башлыгыбыз Юрий Михайлович Перфилов каршы алды.

Радио-телевидение һәрбер җирдә сайлау участокларына яшьләр дә, пенсионерлар да бик актив килә, дип сөйли. Мин дә праймеризда үз фикеремне белдерим, хокукымнан файдаланыйм әле дип уйладым.

– Сезгә чакыру билеты бирделәрме соң?

– Юк, чакыру билеты белән генә киләсе идемени?

– Сайлау исемлегенә керүче барлык сайлаучыларның 20 процентына гына бюллетень бирделәр. Җитәкчеләргә, урта звено кадрларына, укытучыларга, башка интеллигенция вәкилләренә без чакыру билеты өләштек. Менә шулар килделәр, тавыш бирделәр, артык бюллетеньнәребез калмады. Бу чын сайлау түгел бит, праймериз гына. Өч авыл җирлегенә (Урта Көшкәт, Сосна, Субаш) кергән сайлаучылар өчен бер генә сайлау участогы төзеделәр. Чакыру билеты алганнар килеп бетте. Безнең эш төгәлләнде.

– Минем шикелле чакыру билеты булмаганнар участокка килмәдеме?

– Килүчеләр булды.

– Аларның берсен дә сайлауда катнаштырмадыгызмы?

– Иртүк килгәннәренә бюллетеньнәр бирдек.

– Ә соңрак килгәннәргә?

– Сезне борып чыгарган шикелле, борып чыгардык, бюллетеньнәр булмагач нишлибез инде, бер хәл дә юк. Югарыдан шулай кушылды бит. Менә сентябрь аендагы чын сайлауларга килерсез.

– Анда мондый исемлек булмаячак бит.

– Әйе, бер бюллетеньдә партияләр исемлеге, икенче бюллетеньдә бермандатлы округтан кандидатлар исемлеге булачак.

– Алай икән.

– Шулай да, үз фикерегезне белдереп, менә бу анкета кисәген тутыра аласыз.

– Анда кандидатлар исемлеге бармы?

– Андый исемлек юк. Анда ни телисез, шуны яза аласыз. Анкетаның башына “Сезнең фикерегез әһәмияткә ия!” дип язылган.

Праймериз кагыйдәләре буенча, безнең ишеләр анда катнашу өчен 20 көн алдан гариза язарга тиеш булган икән. Мин участоктан «рәхмәт» әйтеп чыгып киттем.