Камал театрының 100дән артык хезмәткәре Санкт-Петербург шәһәренә гастрольләргә китте (ФОТО)

2016 елның 5-10 апрелендә Санкт-Петербургның Г.А.Товстоногов исемендәге Зур драма театры сәхнәсендә Г.Камал исемендәге Татар дәүләт Академия театрының зур гастрольләре үтә. Театр Санкт-Петербург тамашачысына иң яхшы 5 спектаклен тәкъдим итә. Гастрольләрдә Камал театрының 100дән артык хезмәткәре катнаша.

Санкт-Петербург һәм Казан театрлары арасында алмаш гастрольләр традициясе урнашып килә. 2010 елның сентябрендә Г.Камал исемендәге Татар дәүләт Академия театры сәхнәсендә Г.А.Товстоногов исемендәге Зур драма театры гастрольләре үткән иде. Алар Казан тамашачысына М.Горькийның «Васса Железнова», Ф.М.Достоевскийның “Дядюшкин сон” (“Абыйның төше”), Л.Вернейль, Ж.Берр әсәрләре буенча «Школа налогоплательщика» (“Налог түләүче мәктәбе”) спектакльләрен тәкъдим иткәннәр иде. Зур драма театрының чираттагы Казан гастрольләре 2016 елның көзендә булыр дип көтелә. Камал театры илебезнең мәдәни башкаласы Санкт-Петербургка  гастрольләр белән соңгы тапкыр 1990 елның ноябрендә барган иде. Ул елны Ленинградның М.Горький исемендәге Мәдәният сараенда камаллылар Т.Миңнуллинның “Әлдермештән Әлмәндәр”, Н.Исәнбәтнең “Хуҗа Насретдин”, Г.Ибраһимовның “Татар хатыны ниләр күрми”, Г.Каюмовның “Мирас”, М.Гыйләҗевның “Казан егетләре” спектакльләрен уйнадылар.

110нчы юбилей сезонында Камал театры төньяк башкалага 5 спектакль алып бара. Гастрольләр 5 апрельдә театрның “йөзек кашы” булган  “Зәңгәр шәл” спектакле белән ачыла. Гастрольләр афишасында шулай ук «Хуҗа Насретдин», «Дон Жуан», «Банкрот» һәм «Бабайлар чуагы» спектакльләре дә урын алган. «Петербург гастрольләре өчен без булдыра алганча төрле спектакльләр сайларга тырыштык. Монда милли драматургия да, чит ил классикасы да, бүгенге көн драматургиясе дә урын алган», – ди театрның директоры Илфир Якупов.

 Гастрольләр Россия Федерациясе һәм Татарстан Республикасы Мәдәният министрлыклары ярдәме белән үтә.

Белешмәләр өчен: (812) 244-10-71.