Баумандагы "Йолдызлар аллеясе"ннән Айдар Галимов йолдызын чәлдергәннәр? (ФОТО)

Бауман урамындагы татар эстрадасы йолдызлары аллеясы Казанның меңьеллыгы уңаеннан ачылган иде. Алдан анда Илһам Шакиров, Әлфия Авзалова исем­нәре пәйда булды. Тагын бер елдан Мөнирә Булатова, Салават Фәтхетдинов исемнәре өстәлде. Бүген анда Хәния Фәрхи һәм Айдар Галимов исемнәрен дә күреп булыр иде дә... бер йолдыз юкка чыккан шул. Җәүдәт Гыйльманов фаразлавынча, бушлыкта Айдар Галимов йолдызы булырга тиеш.

 

 

Ә бит заманында “Барс Медиа” компаниясе әлеге аллеяны без Голливудтан киммени, дигән сүз­ләр белән үзе башлап йөрде. Бу тәкъ­дим исә “Татар җыры – 2002”дә Салават Фәтхетдинов авы­зыннан чыккан иде. Анда татар эстрадасы йолдызлары гына түгел, режиссерлар, җәмәгать эшлеклеләре исемнәре дә уелыр дигән фаразлар бар иде. Әле ярый бу фикер фараз гына булып калды.

 

“Шырпылы язмалар”ыңда фотосын да чыгар дигәч, Җәүдәт абый чакыруы буенча Бауман урамын әйләндем. Матбугат йорты тирәсендәрәк икәнен белсәм дә, йолдызларны таба алмыйча, шактый йөрергә туры килде. Шулай булмыйни, йолдызлар тоныкланган, исемнәр кырылган, өсләре ком катыш кар белән капланган икән шул инде. Чистартып фотога төшергәндә, җыр­чыларның сүз­ләре дә колакта яңгырагандай тоелды. Мөнирә апа: “Исән чакта исемемне бронзада мәңгеләште­рүләрен күрер­мен дип уйламаган идем”, – дигән иде. Ярый әле йол­дызның бүгенге халәтен күрми. Үз йолдызларының нинди халәттә булуларын беләләрме икән дип, исән җырчыларыбызның да кайберләренә мөрәҗәгать итеп карадык. Алар, без кайгыртырга тиеш түгел бит инде аны, дип әйтү белән чикләнделәр.

 

 

 

Дөрес, йолдызлар аллеясы турындагы сорауны Казан мэ­рия­сенә, “Барс Медиа” компа­ниясенә дә юлладык. Аның директоры Александр Миронов бу уңайдан менә нинди җавап юллады: “Йолдызлар” салынганнан соң, аларны карау, саклау шәһәр мэриясенә күчте. Без – шәхси компания. Ка­зан­ның үзәк урамын саклау, аны тәр­типтә тотуны, билгеле, үз өстебезгә ала алмыйбыз”.  Йолдызлар архитектура ягыннан кыйммәткә ия түгел, шуңа күрә әлеге проблемага шәһәр җитәк­челеге әллә ни борчылмас инде. Ә “Барс Медиа” компаниясе аңа күптән кул селтәгән. Кыскасы, аллеяның хуҗасы юк. 

Бронза йолдызның, бәлки, кыйммәте юктыр. Әмма анда татар халкының моң ияләре – Илһам, Әлфия, Мөнирә исемнәре уелган. Шундый олуг затларның исем­нәрен кадерли белмибез икән, үзебезгә халык буларак хөрмәт күрсәтүләрен таләп итәргә хакыбыз бармы соң безнең?

 

Бу арада татар эстрадасы турында күп сөйләнелә. Күптән түгел генә “Татар җыры” фестиваленең чираттагысы узды, янә шаулап алдык. Миңа калса, татар эстра­да­сының хәлен белер өчен Бауман урамын урарга кирәк. Булдыра алганча җиргә сылаганбыз без аны. Гаеплене читтән эзлисе түгел, үзебез шаккатып, хәйран калып, хуплап башкарылган эш.

 

Ярый әле Татар дәүләт филармониясе мәңгеләштерүнең файдалырак ысулын уйлап чыгарды. Алар да татар эстрадасы йолдызлары аллеясын ачтылар. Әмма ул аллеяда йолдызлар аяк астында булмаячак, анда Илһам, Әлфия чыршылары үсәчәк. Аларын да кисеп алып китмәсләр, шәт.