Татарстан медицинасында ришвәтчелек кимегән ди

Соңгы өч елда Татарстанның медицина тармагында риш­вәт­челек очраклары кими төшкән. Бу хакта күптән түгел республика халкы арасында уздырылган социологик тикшеренү нәтиҗәләре күрсәтә. Кичә көнкүрештәге риш­вәтчелеккә чик кую мәсь­әләләренә багышланган матбугат очрашуында яңгыра­ган мәгълүматлардан аңла­шыл­ганча, 2012 елда Татарстанда яшәүчеләрнең 65 проценты ришвәтчелек бе­лән очрашырга туры килде дип бел­дергән булган.

Быел андыйлар саны 52,6 процентны тәш­кил иткән. Татарстан сәламәтлек саклау министры урынбасары Илдар Фатыйхов сүзләренә караганда, сәламәтлек саклау тар­магындагы ришвәтчелек күренеш­ләре, нигездә, ке­шенең үз хокукларын белеп бетермәве, медицина яр­дәменә ихтыяҗ булу һәм әле дә булса кадр­лар кытлыгы саклану аркасында килеп чыга. Авыру белән табиб арасында элек-электән сакланып килгән стереотип та моңа зур этәргеч ясый, ди ул. Пациент табибны ничек тә булса бәхилләтергә кирәк дип баш катырса, табиб исә мондый “бүләк”не һәрчак алырга әзер. “Быел безгә онкология өлкәсе, бала тудыру йорты кебек оешмаларда ришвәтчелек очраклары кү­зәтелү турында тугыз мө­рәҗәгать килеп иреште”, – ди ул.

Татарстан Пре­зиден­ты­ның Коррупциягә каршы тору сәясәте мәсьәләләре буенча идарәсенең оештыру бү­леге башлыгы Алексей Панкратов кеше үзе үк мондый ямьсез күренешләрнең килеп чыгуына этәргеч бирә дип саный. “Әгәр “өстәге” ришвәтчелек белән дәүләт нәтиҗәле көрәш алып барса, көнкүреш ришвәтчелек оч­рак­ларын кеше үз гамәл­ләрен йөгәнләгән очракта гына юкка чыгарып була, – ди ул. – Кешене берәү дә, әйтик, шул ук табибка, акча “төр­тергә” мәҗбүр итми. Кызганыч, күп очракта риш­вәт­че­лек очракларын кешеләр үзләре китереп чыгара”. Панкратов сүзләреннән аңла­шыл­ганча, Татарстанда яшәү­челәр ришвәткә елына 30 мең сум тирәсе акча сарыф итә.