БАЛАЛАР БАЛА ТАБА!

Узган ел республикада унике-унҗиде яшьлек 893 кыз балага узган. Һәм аларның күбесе аборт ясаткан. “Бу бик куркыныч саннар. Киләчәктә әлеге кызларның бала табуы, дөресрәге сәламәт бала таба алуы шикле. Организм әле өлгереп җитмәгән, ә анда инде шундый зур үзгәрешләр башлана. Бу хатын-кыз сәламәтлеге өчен бик зыянлы. Яшь кызларга шуны төшендерәсе иде”, - диделәр башкаланың беренче номерлы балалар сырхауханәсендә.

Балалар сәламәтлеге турында чаң кагар вакыт җитте – мәктәп яшендәге балаларның алтмыш-җитмеш проценты хроник авырулы ди табиблар. Алдагы елларны Балаларны яклау көне дигәч, күбрәк ятим, гарип балалар күз алдына килә иде. Быел исә бу көн барлык балаларның сәламәтлеген кайгыртуга йөз тотты. “Туганда ук балаларның бик аз проценты гына сәламәт була. Андый көннәрне ай саен үткәрер идем мин”,- диде Казан дәүләт медицина академиясенең ректоры, медицина фәннәре докторы, Русиянең, Татарстанның атказанган табибы Камил әфәнде Зыятдинов. “Элек өч буын бергә яшәгән. Без шулай үстек. Яшәргә шартлар авыр булса да, халык нык, сәламәт иде. Ә хәзер шундый көнгә килеп җиттек – яралгы вакытында ук туачак сабыйны карап, тикшереп торырга тиешбез, шунсыз булмый.”

Табиблар яшь буынның сәламәт булмавын төрле факторга бәйли, беренче чиратта психологик киеренкелеккә. Хәзер мәгълүмат шулкадәр күп  бала, барысын да аңлап, эшләп өлгерми. Тәмәке, алкоголь, наркотик – яшь организмны шулай ук эштән чыгара. Сәламәтлеккә тискәре йогынты ясаучы тагын бер мөһим фактор – яшьтән үк җенси мөнәсәбәткә керү. “Шуларны исәпкә алып, мәктәпләрдә әңгәмәләр алып барачакбыз. Ата-аналарга, үсмерләргә махсус брошюралар таратачакбыз”,- диде табиблар. “Шулай да бездә башка төбәкләр белән чагыштырганда хәл күпкә уңайрак. Заманча яңа җиһазлар  кайтарылып тора . Безнең кафедра ел саен дистәләгән педиатрлар, балалар табиблары әзерли. Балалар сәламәтлеге өчен кулдан килгәннең барысын да эшлибез”, - диде Камил Зыятдинов.