Астахов бәби тартмасына каршы

Киләсе ел башыннан балалар республика клиник хастаханәсендә авыр хәлдәге сабыйлар өчен паллиатив ярдәм бүлеге ачылачак. Бу атнада Россия Президентының бала хокукларын яклау буенча вәкаләтле вәкиле Павел Астахов әлеге дәвалау оешмасында булып китте.

Паллиатив ярдәм Рос­сиядә яңа хезмәт. Шуңа күрә әлегә чит илләр тәҗрибәсе өйрәнелә. Узган ел азагында Санкт-Петер­бургта паллиатив ярдәм буенча беренче конференция оештырылды. “Мин анда бик теләп катнаштым”, – ди Павел Астахов. Ул бер үк вакытта шә­һәр­дәге хос­пис эшчән­леге белән дә танышкан. Бүген мондый бү­лек­ләр ачуга ихтыяҗ зур. “Авыру балалар күплеген истә тотып, аларны һәр шә­һәрдә генә түгел, һәр районда булдырырга кирәк. Бу өлкәдә Казан Мәс­кәүгә караганда да өлгеррәк. Биредәге эш­чән­лек бүтән төбәкләргә дә үрнәк”, – ди Мәскәү кунагы.

Аның фикеренчә, паллиатив ярдәм бүлеге алдынгы технологияләр дә сорамый, аның өчен күп чыгымнар да тотарга кирәкми. Бер почмак табып, эшне башлап җибәрү җитә. Ул балалар республика клиник хастаханәсенең анес­тезиология һәм реанимация бүлегендәге авыр хәл­дәге сабыйлар янында булды. Аннан соң Роналд Макдоналд йортында – балалар һәм әти-әниләр өчен кунакханәдә бул­ды. Арка мускулы зә­гыйфьлеге чире белән авыручы бала тәр­бияләүче Анастасия Матвеева да Казанда паллиатив яр­дәм бүлеге ачылуны шатланып кабул итә. Күптән түгел бронхит белән авырып, кечкенә кызлары ата-анасын куркуга салган. Үпкәгә ясалма сулыш алдыру аппаратын һәм бүтән җи­һазларны машинага төяп (бала шуларсыз яши алмый), балалар клиник хастаха­нәсенә чыгып кит­кәннәр. Гаилә җаен тапкан да бит... Анастасия кү­тәргән сорау да транспорт мәсьәлә­сендә. “Паллиатив ярдәм бүлеге ачылыр, аңа шигем юк. Тик балалар бит анда вакытлыча гына булачак. Ә авыру сабыйларны өйдән ташу өчен транспортны кем кайгыртыр?” – дип борчыла ана. Чыннан да, сорау урынлы. Гәүдәсен тота алмаган урын өстендәге сабыйлар автобус белән дә, хәтта такси белән дә йөртер­лек түгел.

Арада аз керемле гаиләләр дә бик күп. Мондый гаиләләргә күбрәк хәйрия фондлары ярдәмгә килә. Үп­кәгә ясалма сулыш алдыру аппараты гына да якынча миллион сум тора. Аппаратларны куллану өчен көн саен зур чыгымлы махсус катетерлар кирәк. Аларны кем алып бирәчәк һәм кем яңартып торачак? “Һәр авыруны дәва­лауның нечкә­лекләре, үзен­чә­лекләре бар. Шуңа күрә барлык чирләр буенча аерым схема булдырырга ки­рәк һәм ул эш системалы алып барылырга тиеш”, – ди Анастасия.

Павел Астахов әлеге мәсьәләне федераль дәрә­җәдә күтәрәчәк. Аның фике­ренчә, бүген хәйрия фондлары зур эш башкара, еллар буена сузылган кайбер чете­рек­ле сорауларны, кайчак, 15 минут эчендә хәл итеп куялар. Ә менә төбәкләрдә барлыкка килүче бэби-боксларга каршы ул. Махсус тартма­ларны әниләр бәләкәчләрне теләсә кайда – урамда, чүп­лектә, чормада ташлап калдырмасыннар өчен куймакчылар. Кызганыч, андый аяныч күренешләр бездә дә булып тора һәм еш кына мәр­хәмәтле кулларга килеп эләк­кәндә бәби инде үлгән була.

– Бөтен шәһәргә бер тарт­ма куеп кына бала гомерен сак­лап булмый, – ди вә­ка­ләтле вәкил. – Моның өчен аны һәр йортка, һәр подъездга куеп чыгарга кирәк. Тарт­мага салып калдырылган са­быйның ата-анасы, нә­селе кем, ул кайсы милләттән? Бала үскәч, ул хакта беләсе килер бит. Монда бала хокукы бозыла. Балалар белән эш­ләү­че төрле оешмалар, экспертлар белән сөйләшкән бар, алар да бэби-бокслар яклы түгел. Сабыйдан баш тартучы яшь әниләр кыен хәлдә югалып калуны сылтау итәләр. Әйе, аларга ярдәм кирәк. Юк, матди ярдәм турында гына сүз бармый. Авыр хәлдә калучылар күп, ләкин бөтен кеше дә баладан баш тартмый, аны тартмага ыргытып китми. Шулай булгач, кечкенәдән тәрбия ягын кайгыртырга кирәк.