07.09.2015 Спорт
Түбән Новгород өлкәсе яшьләре спортта югары үрләр яулый
Бу өлкәдә Сафаҗайдан Розалия Насретдинованы, Рбишчадан Алия Мостафинаны, Ыргудан Надир Исхаковны (август ахырында ул Таиландта үткән тай боксы буенча дөнья чемпионатында икенче урынны яулап кайтты), Камкадан Айрат Мангушевны, Өчкүлдән Дамир Җәфәровны, Кочко-Пожардан Камил Муллинны мисал итеп китерергә мөмкин.
Хәзер алар сафына тагын бер рбишча¬лы кызчык Мәдинә Валемеева күтәрелеп бара.
Август башында Саранскида укучылар арасында үткәрелгән Россия спартакиадасында катнашып, ул ядрә этәрү буенча беренчелекне алган. Мәдинә чы¬гышы белән Зур Рбишчадан, Россиянең атказанган физкультура хезмәткәре Зәки ага Валемеевның оныгы була. Уку елы буена Казанда яшәсә дә, җәйге каникулларын ул Уразавылдагы йортларында үткәрә. Әтисе Рәис әфәнде кызына күнегүләр ясау өчен абзарда төрле спорт җиһазларыннан торган махсус мәйданчык җайлаштырып куйган, кызының шөгыльләнүен гел контрольдә тота, киңәшләр биреп тора.
Мәдинә бабасы Зәки абыйның юлын дәвам иттерергә теләп булса кирәк, үзенең тормышын спорт белән бәйләргә җыена.
- Безне башта Чабаксарга Идел буе федераль округына кергән регионнардан сайлап алу турына җыйдылар. Шушы турда мин икенче урынны яуладым һәм илебез күләмендәге спартакиадага уздым. Анда беренче урынны яулавымда мин Казандагы тренерым Олег Арбеевка, әтием һәм бабакаема зур рәхмәтле. Алар күрсәткән юл миңа уңыш китерде. Мин кечерәк яшьтә йөзү белән мавыга идем, ә хәзер инде җиңел атлетикага кергән спорт төрләрен, бигрәк тә ядрә этәрүне аеруча яратып үзләштерәм. Быел минем соңгы уку елы булганга, алдагы имти¬ханнарга әзерләнәсем бар. Шуны истә тотып, спортны икенче планга куярга мәҗбүрмен. Ә яшь егет-кызларга теләгем шул: сәламәт яшәү рәвешен алып барсыннар, кыенлыклардан курыкмасыннар, ялкаулыкка бирешмәгән кеше һичшиксез уңышларга ирешә ала, - ди яшь чемпион.
16 яшен дә тутырмаган Мәдинәнең спорт копилкасында төрле кубоклар, грамота¬лар һәм күпләгән медальләр байтак инде. Спорт мастерлыгына кандидат таныклыгы да алып өлгергән. Җәйге каникулларда чакта физик тәрбия буенча Мәдинә белән Зәки абый Валемеев шөгыльләнә.
- Күпчелек вакытын спортка багышласа да, ул әле иҗат эше белән дә кызыксы¬на, төрле хикәяләр яза, - ди оныгы өчен чын күңелдән шатланып Зәки абый Валемеев.