Шашлык кыйммәткә төшмәгәе

Гомумән алганда, ел башыннан Татарстанда 909 янгын очрагы теркәлгән. Бу хакта Татарстан Хөкүмәте йортында узган брифингта Гадәттән тыш хәлләр министрлыгының Татарстандагы идарәсе башлыгы урынбасары Сергей Сергеев җиткерде. Иң күп янгын чыгу очраклары Әлмәт, Кама Тамагы, Алабуга, Лениногорск, Түбән Кама, Нурлат, Мөслим районнарына, Чаллы, Казан шәһәрләренә туры килә. Кызганыч, корбаннар да бар. Утлы фаҗигаләрдә 89 кешенең гомере өзелгән, 140 кеше төрле дәрәҗәдә тән җәрәхәтләре алган. Һәр очракта да янгын чыгуның төп сәбәпчесе – кеше үзе. Кемдер, кайдадыр игътибарсыз кыланган.

 

Ә белгечләр язгы чорда аеруча игътибарлы булырга куша. Хәзерге вакытта Татарстан террито­рия­сен­дә бернинди дә учак ягарга яра­мый, хәтта үз бакчаңда да. Мо­ның өчен 2 мең сумнан алып 4 мең сумга кадәр штраф каралган. Вазыйфаи затлар өчен ул 15-30 мең сум, юридик затлар өчен 400 мең сумнан башлап 500 мең сумга ка­дәр тәшкил итә. Учак ягып, шашлык кыз­дырып каршы алына торган май бәйрәмнәрендә күзәтү эшләре аеруча җитди алып барылачак. Шул рәвешле, шашлык пешерү­че­ләргә карата да штрафлар зур быел.

 

 

Коткаручылар республикада янгын куркынычы аеруча зур булган урыннарның исемлеген дә төзегән. Шул рәвешле 86 торак пункт исәпкә алынган. Брифингта катнашкан урман хуҗа­лыгы министры Алмас Нәзиров сүзлә­реннән аңлашылганча, 6 урман хуҗалыгы кишәрлеге (Әгерҗе, Шәһәр яны, Яшел Үзән, Алабуга, Лубян урманчылыгы, Арча ур­ман­чылыгының бер өле­ше) аеруча зур куркыныч астында. Янгын ут белән саксыз кылану аркасында гына түгел, гап-гади пыяла аркасында да чыгарга мөмкин. “Үз күзем белән күр­мәсәм дә, пыяла кызып, коры үлән янып китү очраклары турында беләм”, – диде министр. Урманнарда андый-мон­дый янгын чыга калса, бүген республикада алты меңгә якын кеше “кызыл әтәч” белән кө­рәшергә әзер тора, моның өчен махсус 760 автотехника, 2 вертолет, 5 янгын сүндерү поезды һәм 1 катер әзерләнгән. Соңгы дүрт ел эчен­дә Россия урманнарында ике меңгә якын янгын чыккан, нә­ти­җәдә 450 меңнән артык гектарда урман янып көлгә әй­ләнгән. “Бездәге урманнарның өчтән бер өлеше кадәр бу, – ди Алмас Нә­зиров. – Соңгы дүрт ел эчендә Татарстан урманнарында бер янгын да теркәлмәде. Урман ян­гыннары­ның күбесе нәкъ менә корыган үләнгә ут төртү нәти­җәсендә башлана. Шуңа күрә быел республика башлыгы Рөстәм Миңнеханов республикада кип­кән үләнне яндыруны тыю турында күрсәтмә бирде”.

 

Һава торышына карап

 

Янгынга каршы махсус ре­жим­ның күпме дәвам итәчәге әлегә билгеле түгел, барысы да һава шартларына бәйле булачак. Әйтик, узган елда ул 15 ноябрьгә кадәр дәвам иткән. Әмма режим кертелде дә мәсьәлә хәл ителде дигән сүз түгел. Авылларда, мәсәлән, корыган үлән, агач ботакларын тутырырга махсус тимер савытлар юк, чүп чыгару тәртибе эшләнеп бетмәгән. Шулай булгач, әйләнә-тирәсендә тәртип урнаштырырга теләгән кеше нишләсен? Чүпне үз бакчасында яндырудан башка чарасы калмый. Бер яктан, чистарынмыйча булмый, ә икенче яктан, ут ягарга ярамый. Дөрес җавапны һәркем үзе сайлый. Әмма ул җавап фаҗигагә генә китермәсен иде. Штрафтан куркынычрак нәрсәләр бар бу дөньяда.