К.Кәримов Тукай премиясе лауреатларыннан канәгатьме? Һәм ник Р.Корбан трубканы ташлаган?

Камил Кәримов, Ләбиб Лерон, Рафис Корбан тәкъдим ителеп тә быел Тукай бүләген ала алмадылар. Хәлләре ничек икән, дип Габдрәхим белешкән.

– Камил абый, “быел да Тукай премиясен бирмәсәләр, ояты миңа булмас”, дигән идегез...

– Татар әдәбиятын үз телендә укый белмәгән кешеләр миңа бәя бирде. Шул...

Камил Кәримов сүзне кыска тотты. Шагыйрь Рафис Корбанга шалтыратып карыйм әле, ул ни дияр икән?

– Рафис абый, Тукай бүләгенә дәгъва кылганда матбугат битләрендә сезгә каршы бик күп язмалар дөнья күрде. Премия ала алмавыгызда бу язмаларның тәэсире булды дип саныйсызмы?

– Мин “Акчарлак”ка бернинди интервью бирмим...

– Ник?..

Шушы сораудан соң шагыйребез телефон трубкасын ташлады...

Чиратта – Ләбиб Лерон. Кесә телефонын хәләл җефете алды: “Ләбиб дачага китте, телефонын өйдә онытып калдырган”, – диде ул (Мин “Безнең Мирас” журналының баш мөхәрриренә дүшәмбе көнне көндез шалтыраттым, нишләп йөридер инде ул бу вакытта дачада...)

Нәҗибә Сафинага да шалтыратып алыйм әле.

– Нәҗибә ханым, Клара Булатовага Тукай премиясен бирү белән сез канәгатьме?

– Чагыштырмача канәгать. Башкаларның әле Тукай премиясенә лаек иҗатлары юк.

– Лаек иҗат нинди соң ул?

– Татар әдәбияты, татар дөньясында булган иң кыйммәтле, асыл, олы сүз. Иң зур әсәр. Ул әсәр алдан ук халыкка чыгарылырга тиеш. Фикер алышынып, халык аны иң зур әсәр дип әйтергә тиеш. Өч-дүрт кеше генә бу бүләкнең язмышын хәл итәргә тиеш түгел.

– Шундый әсәр бармы?

– Әлегә юк. Әмма мин Фәүзия Бәйрәмова, Айдар Хәлимнәрне узып Рафис Корбанга Тукай премиясен бирү ягында түгел идем.

Мәгъсүм Гәрәев белән дә сөйләшеп алырга булдым.

– Мәгъсүм абый, сез канәгатьме?

– Канәгать. Элегрәк елларда бу премия ел саен бирелми иде. 1961-65 елларда Тукай премиясе гомумән бирелми торды.

– Сез алдыгызмы?

– Тукай бүләге өчен тырышмыйм. Мин үзем Тукай бүләге. Ел саен биреп без әлеге бүләкнең бәясен төшерәбез. Сыерга печәнне күп итеп салсаң ул аны ашамый, таптап йөри башлый...