НӘКЪ 100 ЕЛ ЭЛЕК

Апрель – бөек шагыйребез Габдулла Тукайны тудырган һәм арабыздан алып киткән ай. Шуны истә тотып тотып, Г.Тукай музее апрель ае дәвамында бөек шагыйребезгә багышлап “Яздан аерып булмый Тукайны” дип исемләнгән тематик чаралар үткәрә. Әлеге циклны 2 апрельдә “Сабыйларның күңел кыңгыраулары” дип аталган күргәзмә ачып җибәрде. Анда җөмһүриятебез рәссамнары тарафыннан иҗат ителгән график эшләр тәкъдим ителде. Әлеге рәсемнәр “Мәгариф” милли нәшрияты заказы буенча әзерләнгән.

Күргәзмә кысаларында Габдулла Тукайның “Энҗе бөртекләре” китабын тәкъдир итү кичәсе дә оештырылды. Габдулла Тукай балаларны укыту-тәрбияләү өлкәсенә зур өлеш керткән әдип. Ул мәктәп-мәдрәсәләр өчен махсус хрестоматияләр төзегән, балалар өчен бик күп шигырьләр язган. Аның “Энҗе бөртекләре” китабының беренче тапкыр басылып чыгуына да  нәкъ 100 ел тулды. Күптән түгел генә  “Мәгариф” нәшриятында әлеге китапның яңа басмасы дөнья күрде. “Энҗе бөртекләре” каты тышлы, матур, төсле рәсемнәр белән бизәлгән.  “Мәгариф” нәшриятының тагын бер үзенчәлекле ягы бар. Ул үз китапларында еш кына балалар ясаган рәсемнәрне куллана. Мондый китапларны  укучылар аеруча теләп алалар икән. Ә балалар рәсемнәре белән бизәлгән “Кәҗә белән Сарык турында әкият” (Габдулла Тукай) китабы, “Ал җилкәннәр” (“Алые паруса”) Бөтенрусия конкурсында Мактау грамотасы белән бүләкләнгән.

  100 ел элек                                             100 елдан соң