Ташламаларны арттырмакчылар

Депутатлар ялгыз аналарга өстәмә ташламалар билге­ләргә тәкъдим итә. Проектның авторы – ЛДПР депутаты Виталий Золочевский сүзләренчә, мондый гаиләләргә ярдәм чаралары җитәрлек түгел.

Депутат нинди ташламалар тәкъдим итә соң? Проект­та саналган күптөрле ярдәм чаралары арасында ялгыз ана тарафыннан тәрбияләнүче ба­­ланы тиешле дарулар һәм медицина җиһазлары, сәла­мәт­леге буенча тиеш дип табылса, шифаханә-курорт­лар­га юллама белән тәэмин итү, дәвалану урынына бушлай бару, шулай ук шәһәр яны тимер юл транспортында бушлай йөрү мөмкинлеге тудыру да бар. Шушы ук ташламаларны туганнары яки чит кеше тарафыннан уллыкка алынган балаларга да бирү күздә тотыла.

Депутат фикеренчә, авыр хәлдә калган балаларның мондый ярдәмгә мохтаҗлыгы көн кебек ачык. “Әлеге законны кабул итү гаделлекне торгызу булыр иде. Бу илдәге социаль киеренкелекне дә киметәчәк”, – дип саный ул.

Казан псиохологы Наилә Бәширова сүзләренчә, мәсь­әлә ике яклы. “Әлбәттә, мондый гаиләдә тәрбияләнү­че­ләр­­гә ярдәм кирәк. Әнисе бе­лән генә үсүче бала үзен ким итеп тоя. Бала төрле як­лап тулы тәрбия алсын өчен әти-әни, әби-бабай булырга тиеш, – ди ул. – Әмма мәсь­әлә­нең икенче ягы да бар.

Ташламалар кертелсә, әни кеше матди якны өстен күреп, гаилә коруга омтылмаска да мөмкин. Хәзер язылышмыйча торучылар бар. Аларның, таш­лама би­рел­сә, бала туса да язылышмый яшәүләрен дә­вам итү­лә­ре ихтимал. Язылыш­ кан гаи­ләләр көчлерәк була. Ир кеше дә үзен җаваплы итеп тоя. Шуңа күрә ташлама бил­ге­ләгәнче, ананың баланы ни өчен ялгыз тәрбияләвен ачык­­­ларга, психологик тестлар узар­­га тәкъдим итәргә ки­рәк­тер”.