ХӘЙРУЛЛИНА ФИРДӘВЕС ХӘБИБУЛЛА КЫЗЫ

(1951–2003)

Лаеш районы Агайбаш авылында туа.

1970 елда Казан театр училищесын тәмамлый һәм Татар академия театрында эшли башлый. Самими күңелле яшь кызлар, шулай ук катлаулы кичерешләргә бай хатын-кыз образларын тирән эчке драматик көч белән, табигый итеп гәүдәләндерә белә.

Аның рольләре: Финея — «Җүләр кыз» (Лопе де Вега), Мөршидә — «Мәхәббәтең чын булса» (Х.Вахит), Сайра — «Ир-егетләр», Дания — «Илгизәр + Вера», Кәтернә — «Гөргөри кияүләре», Нурания — «Монда тудык, монда үстек» (Т.Миңнуллин), Гөлбану — «Татар хатыны ниләр күрми» (Г.Ибраһимов), Варя — «Бер төн» (Б.Горбатов), Гөлчирә — «Ташкыннар» (Т.Гыйззәт), Анджолетта — «Хатыннар гайбәте» (К.Гольдони), Зөһрә — «Һиҗрәт», Эсмеральда — «Зифа», Мәстүрә — «Портфель» (Н.Исәнбәт), Кәләш — «Кияү белән кәләш» (М.Байҗиев), Маһинур — «Миңлекамал» (М.Әмир), Катарина — «Тискәрегә авызлык» (В.Шекспир), Гөлемхан — «Ахырзаман» (Ч.Айтматов), Халисә — «Су төбендә сөйгәнем», Мәрфуга — «Кишер басуы» (З.Хәким), Зөләйха — «Зөләйха» (Г.Исхакый), Саимә — «Әни килде» (Ш.Хөсәенов), Элен — «Гаугалы гаилә» (Эд.де Филиппо) һ.б.

Татарстанның хал. арт. — 1995 ел.
РФ атказ. арт. — 2002 ел.