«COUNTER-SТRIKE»

Компьютер уеннары күптөрле була: спорт уеннары, автоузышлар, стратегик һәм атыш уеннары. Атыш уеннарын күбрәк малайлар ярата. Шулар арасында иң киң таралганы — «Counter-Strike». Бу уенны 1999 елда «Valvе» компаниясе эшләп чыгарган. Шул елдан әлеге уенчык күп геймерларның (компьютер уенчылары үзләрен шулай дип атый) йокысын качырды.

Бу — бик катлаулы уен. Аңа төшенер өчен, бер тапкыр гына компьютер артына утыру җитми. Максат — террорчыларга каршы тору. Бандитлар шактый күп. Алар бомбалар куя, шәһәр халкына һөҗүм итә, автоматлардан ата. Шуларга каршы торучы полиция хезмәткәрләре бар. Без — шул полиция офицерларының берсе инде. Уенны берьюлы 32 (!) кеше уйный ала. Бу очракта компьютерлар үзара интернет челтәре йә эчке аша тоташкан булырга тиеш.

Геймер уенның шартларын үзе билгели. Автомат, пистолет, пулемет, бомба — теләсә кайсын сайларга була. Сугыш кыры да төрледән-төрле: шәһәр урамы, ташландык завод, чиста офис, кибет, таулы урыннар һ.б.

Уенны башыннан ахырына кадәр уйнап бетерү мөмкин түгел диярлек, чөнки комбинацияләр мең төрле. Атыш уены тизрәк фикерләргә өйрәтә, хәтерне яхшырта. Америкада полиция хезмәткәрләре дә шушы уен белән «практика үтә» диләр. Дөрес, бу тикшерелгән мәгълүмат түгел, бәлки геймерларның фантазиясе генәдер. Әмма шунысы факт: дөньяда инде күптән «Counter-Strike» буенча ярышлар уздырыла. Шул исәптән Казанда да.

Кайвакыт уенчы үз дус-ишләре арасында оста геймер санала, әмма Россия буенча яки дөньякүләм ярышта берни дә эшли алмый — отыла. Мондый зур ярышлар үткәрү авыр эш түгел, интернет челтәре булганда, өеңнән чыкмасаң да ярый.

Шуны истә тотыгыз: «Counter-Strike» кебек уеннар кешене үзенә «суырып» алып кереп китә. Компьютер каршында узган берничә сәгать сизелми дә. Шуңа күрә уен вакытын алдан ук билгеләгез һәм артыгын утырмагыз.