Халыкка нәрсә җитми?

Һиндстан халкы мәҗбүри рәвештә теш табибына йөрергә тиеш булачак. Илдә теш авыруларына каршы көрәш башланган. Андагы халык елмаерга бик ярата икән.
Ләкин сәламәтлекләрен ар­тык кайгыртмаулары аркасында, черек тешләрне күрсәтеп елмаючы индуслар туристларны куркыта башлаган. Хәзер алар даими рәвештә теш табибына йөреп, теш пастасын куллана башларга тиеш булачак. Ә сез халыкны нәрсәне эшләргә мәҗбүр итәр идегез?

Рафил НОГМАНОВ, Татарстан Дәүләт Советы Законлылык һәм хокук тәртибе комитеты рәисе урынбасары:

– Элек СССРда профилактика дигән нәрсә бар иде. Минемчә, ул хәзер тиешле дәрәҗәдә башкарылмый, бераз аксый. Сәламәтлек хәзер күбесенчә акчага корылган. Әнә шул ягы борчый. Ләкин, ничек кенә булмасын, халыкны елмаерга мәҗбүр итәр идем. Моның өчен, билгеле, өйдә – тынычлык, кесәдә акча булуы да кирәк. Икенче яктан караганда, елмайган кеше барлык максатларына җиңел­рәк ирешәдер ул.

Дина МАЙЛОВА, Татарстан Кулланучыларның хокукларын яклау комитеты­ның Казан бүлекчәсе башлыгы:

– Кешеләргә законнарны өйрәтү дәресләрен укытырга кирәк. Билгеле, бар кодекс­лар сатуда бар, ләкин халык аларны дөрес итеп аңлый һәм тормышта куллана белми. Безгә мөрәҗәгать итүче­ләрнең кү­бе­се законнар бе­лән таныш түгел. Комитет бу өлкәдә эшли, билгеле. Сатучылар, эшмә­кәрләр өчен семинарлар үткә­рәбез, санаторийларга барып, пенсионерлар белән эш алып барабыз. Мәктәпләрдә югары сыйныф укучылары белән аралашабыз – үз хокукларын шул яшь­тән үк белеп торсыннар. 1997 елдан бирле эшләү дәверендә кулланучыларның белемнәре бермә-бер артты анысы. Лә­кин бу гына аз. Куллану базарында көн саен диярлек яңа продуктлар пәйда була. Әнә шулар арасында адашып калып алданмас өчен, законны белү кирәк.

Габдулла ГЫЙЛӘҖЕВ, Татарстан Имамнар белемнә­рен арттыру үзәге директоры:

– Вуз укытучыларын ел саен ялган детекторын үтәргә мәҗбүр итәр идем. Бәлки әлеге алым алар арасында ришвәтчеләр санын киметергә ярдәм итәр. Зачет, имтиханнарны ничек алалар? Студентлар чыннан да бар фәннәрне үзләштереп, имтиханны үзләре тапшырамы? Хәер, детектор аша бүтән өлкәдә эшләүчеләр дә үтсә була. Риш­вәтне бездә вуз укытучыларыннан кала күп кенә бүтән белгечләр дә ала бит.

Антонина ШАКИРОВА, Казан дәүләт медицина университеты студенты:

– Һәркемне ел саен яман шеш авыруларына тикшерү үтәргә мәҗбүр итәр идем. Бер ай элек әлеге авырудан әнием вафат булды. Бер ел элек кинәт йөзләре саргаеп, ябыга башлагач, табибларга мөрә­җә­гать иттек. Ләкин ул вакытта авыру үз тамырларын җәйгән булган инде. Табиблар: “Баштарак белгән булсак, операция ясап, бәлки, җиңгән дә булыр идек”, – диделәр. Әнә хәзер әби-бабайларны компьютерда эшләргә өйрә­тә­ләр бит. Уку, белем алу өчен беркайчан да соң түгел. Ә авыру көтми.