“Артур агай, эшлә давай!” яки көрәш буенча Россия чемпионатында күргәннәрдән

Татарстан командасы өчен чемпионатта ике тренер – Чаллыдан Илнур Хәйбуллин (Аның кул астында шөгыльләнгән өч көрәшче чемпионатта чемпион булып калды! - Л.Й.) һәм “Зилант” клубы тренеры Илмир Төхвәтуллин җаваплы итеп билгеләнгән иде. Нәтиҗәләребез бик яхшы булды.

 

10 үлчәү авырлыгында көрәшеп, Татарстан егетләре 8 алтын медаль яулады! Менә ул чемпионнар: Алексей Абрамов (60 кг), Ислам Фәлахов (70 кг), Динар Кәримуллин (75 кг), Ранис Галимуллин (85 кг), Азат Габдрәшитов (90 кг), Радик Сәлахов (130), Ранис Гыйләҗетдинов (130+). Яңалык итеп кертелгән абсолют категориядә Раил Нургалиев җиңү яулады.

 

Кызганыч, быелгы чемпионатта танылган көрәшчеләребез Булат Мусин белән Илнар Закиров чемпион була алмады. Алар җиңәчәк, дигән ышанычыбыз зур иде. Чит төбәкләргә килгәндә, өч көрәшче алтын медальгә ия булды: Ульян өлкәсеннән Артур Хәкимов (65 кг), Башкортстан республикасыннан Артур Зөлкәрнәев (80 кг), Ленинград өлкәсеннән Руслан Рәфыйков (100 кг). Сүз уңаеннан, Ульян өлкәсеннән булган Артур Хәкимов милли көрәш үссен өчен туган авылында зур эшләр алып бара. Чит төбәкләрдә көрәшкә шундый игътибар булу безне сөендерә. Артур хакында якында аерым язма да эшләрбез әле.

 

 

Җиңүчеләргә акчалата бүләк, медаль, кубоклар тапшырдылар. I – 30 мең сум, II – 20 мең сум, III урынга 10 мең сум бирелде. Артур Зөлкәрнәев финал ярышында келәмдә безнең Рафаэль Кәлимуллин (Әлмәт районы өчен көрәшә. – Л.Й.) белән туры килде. Озак бил алыштылар. Залда артымда башкорт яшьләре утырды. Бишбүләк районыннан килгәннәр икән. “Артур агай, эшлә “давай”, – дип шулхәтле кычкырып җан атып утырды алар. “Агай” дип матур итеп әйткәннәре бүген дә колакта яңгырап тора әле. Шундый фанатларының да ярдәме тими калмагандыр, Зөлкәрнәев җиңү яулап, чемпион булды. Рафаэлебез дә бик көчле иде, җиңәргә аз гына җитми калды...

 

60 кг авырлыкта бил алышкан Эльнур Алиев Луганск Халык Республикасыннан килгән. Хакасия көрәшчесенә җиңелде ул, әмма аңа карап кәефе төшмәде. “Машинага төялешеп килдек. Казанны сагынып киләбез. Аны күреп китү – безгә үзе бер бәйрәм!” – диде Эльнур. “Сездә матур. Татарстан халкы кунакчыл. Ризыкларыгыз да тәмле. Менә чәкчәктән авыз итәргә өлгермәдек әле. Бүген чәкчәк белән чәй эчәргә җыенабыз”, - дип өстәде шулай ук ЛНРдан килгән, әмма җәрәхәтләре аркасында көрәшә алмаган Дмитрий Куриленко.

 

Чаллы көрәшчесе Азат Габдрәшитов 90 кг авырлыкта көрәшеп, Россия чемпионатында беренче тапкыр җиңү яулады. Азат көндәшен “бәреп” чыккач, рәхәтләнеп идәндә сөйләшеп утырдык.

 

 

-Чыгышым белән Актаныш районы Татар Суксуы авылыннан мин. Көрәш белән 5 сыйныфтан шөгыльләнәм. Беренче тренерларым -Раил Сираев белән Марсель Шәйхәйдаров. 18 яшемнән Чаллыда көрәшә башладым. Тренерым – Илнур Хәйбуллин. Көрәшче буларак, үземне Чаллыда таптым, биредә чыныктым, бер-бер артлы нәтиҗәләр килә башлады. Үсәр өчен, көндәшләр кирәк. Ә авылда андый мөмкинлек азрак иде, - диде безгә чемпион Азат.

 

-Россия чемпионатында катнашасы килде инде. Кем белә бит, киләчәктә, бәлки мондый мөмкинлегебез булмас та... – диде Радик Сәлахов сөйләшеп торганда, сүз уңаенда. Көрәшчеләр шундый сүзләр әйтә башласа, күңелсез дә булып куя. Келәмнән берсен дә җибәрәсе килми. Тик һәрнәрсәнең үз вакыты. Җәрәхәтләр дә үзенекен итә. Сәгате кайчан сукканын һәркайсы үзе чамалый инде. Матур ярыш карап, җиңүчеләргә бүләкләрне тапшырып, кичке сәгать 10 нчыларда гына өйләргә таралыштык. Хәзер киләсе ярышларны көтеп калабыз.