Халык медицинасы бармы әле?

6 апрельдә Камышлы районы, Иске Ярмәк авылы мәчетенә мәртәбәле кунаклар килеп төште, дип хәбәр итә. Габдулла МөхәммәдКәрим. Араларында Казанның “Түбәтәй” ашханәләре һәм туклану нокталары челтәре хуҗасы, якташыбыз Солтан Сафин һәм Европа тарих университетының Санкт-Петербургтагы факультеты профессоры, философия фәннәре докторы, Ш. Мәрҗани исемендәге Тарих институты директоры урынбасары Альфрид Бустанов та бар иде.

Альфрид әфәнде тарихчы, ислам дине белгече, “Книжная культура сибирских мусульман” монографиясе авторы һәм Коръән тәфсирен гарәп имлясыннан кириллицага күчергән шәхес буларак билгеле. 

Кунаклар башта Татар Байтуганы авылындагы Сәләй Вагыйзов музеен, борынгы мәчетен карап чыктылар. Шуннан Иске Ярмәк авылы мәчетенә килеп җиттеләр. Биредә алар авыл тарихы кулъязмасы, кайбер сирәк китаплар белән танышып чыкканнан соң Камышлыга - тарихи мәчеттә узачак очрашуга юл тоттылар. Бу сәфәрнең төп максаты да борынгы кулъязмаларда тупланган тарихи мәгълүматларны саклау, халык табибларының дәвалау ысулларын өйрәнү, югалып баручы милли мирасларыбызны киләчәк буыннарга тапшыру иде.