18.09.2023 Шоу-бизнес

Гөлназ Шәрипҗанова: “Без үпкә сакламыйбыз”

Танылган җырчы Гөлназ Шәрипҗанова социаль челтәрдәге сәхифәсендә язылучыларының сорауларына, уенын-чыннын кушып, җавап биргән.

- Буегыз һәм авырлыгыгыз нинди?

- Буй һәм авырлыкта үзгәрешләр юк.

- Сез концертта чакта балалар кем белән кала?

- Барысына да эләгә.

- Сез баштарак кайда идегез соң? Шундый тиз менеп киттегез.

- 9 ел килдек. Килеп җиттек, димәк.

- Сезнең тормышта ирешкән бөтен уңышларыгыз синең аркада гына, дөресме?

- Уйлап карыйк: бер кеше бала ясый алмый, бер кеше бала таба алмый. Бер үзеңә генә тормыш корырга бик авыр. Бөтен уңышларыбыз - икебезнең фидакарь хезмәтенең нәтиҗәсе. Безнең репертуарны да Илсур сайлый, җыя. Гаиләдә ул максималист, ә мин тыйнак кына. Онытмагыз, ирем Актаныштан.

- Закиров (саксофончы Айрат Закиров турында сүз) күренми башлады.

- Айрат - оста музыкант. Буш вакыты булганда ул безнең белән эшли. Биюче кызларыбыз да бер-берсен алыштырып тора ала. Безнең белән чыгыш ясаудан кала, аларның да эш, уку, шәхси тормышы бар. Һәрберсен яратабыз, хөрмәт итәбез.

- Хыялыгыз бармы?

- Дөресен әйтәм, уйлаган юк. Өй, фатир, машина - барысы да бар, Аллаһка шөкер. Ипотеканы да рәхәтләнеп түлибез. Минем өчен эчке гармония мөһим, тиз кызып китә алам. Хәзерге вакытта диңгезгә барасы килә.

- Азнакайга кайтасызмы?

- Туган якта чаралар үткәрәләр, безне дә, әнине дә чакырмыйлар. Ә әни мәдәният өлкәсендә күпме еллар хезмәт итте. Заманында танылган җырчы иде. Башка районнар якташлары белән горурланалар, элемтәләрне өзмәскә тырышалар. Без үпкә сакламыйбыз. Азнакайдан дигән язу паспортта гына калды. 10 яшемнән Казанда торам, шуңа күрә үземне казанлылыр рәтенә дә кертә алам. Әби-бабай сау-сәламәт Азнакайда яшиләр.

---
Шәһри Казан
№ --- | 18.09.2023