20.07.2022 Җәмгыять

"Башта ирем үлде. Хәзер өем дә калмады. Кияргә киемебез юк"

Кукмара районының Кенәбаш авылында 11 яшьлек Әлфинә 12 яшьлек абыйсы Ринат белән кечкенә ике сеңлесен янгыннан коткарган. Хәлимовлар — күп балалы гаилә. Әлфия апаның ире 2019 елда вафат була, шуннан соң ул дүрт баласын ялгызы тәрбияли. Янгын чыккан вакытта ул бакчада эшләгән. Балалар ишегалдында булган, 2 яшьлек кечкенә кызы өйдә йоклаган.

Янгын йорт эченнән чыккан дип фаразлыйлар. Авыл халкы чәй кайната торган термопот — “заманча кытай самавыры” электр чыбыгына зур көчәнеш биргән дип тә сөйли. Әлегә сәбәпләре төгәл ачыкланмаган, тикшерү бара.

Янгын чыгуны кисәтә торган җайланмаларның тавышын ишетеп, Әлфия апаның олы улы Ринат тизрәк әнисен кисәтергә йөгергән, 6 яшьлек сеңлесен урамга алып чыккан. Икенче кызлары Әлфинә исә өйдә йоклап яткан 2 яшьлек сеңлесе Динияне күтәреп чыккан.

— Янгыннан соң балаларны күрдем, шөкер, үзләренә зыян килмәгән. Әлфинәнең чәче бераз көйгән. Балалар бик акыллы, тырыш. Гаилә бернәрсәсез калды, аларга кулдан килгәнчә ярдәм итәргә тырышабыз, — ди Ринат белән Әлфинә укый торган Пүчинкә-Кучук авылы мәктәбе директоры Алмаз Фәйзрахманов.

Йорт тулысынча янып бетмәсә дә, анда яшәрлек түгел. Хәзер гаиләне вакытлыча хастаханәгә урнаштырганнар. Әлфия апаның барлык документлары, паспорты янган. Шуңа да ярдәм итәргә теләүчеләргә ул үзенең карта номерын да тәкъдим итә алмый.

— Йорт иремнең туган нигезе иде. Башта ирем үлде. Хәзер өе дә калмады. Кияргә киемебез юк. Өстебездә нәрсә бар, шул гына. Ярый авылдашлар ярдәм итә. Рәхмәт. Олы балалар борчыла. Әлфинә Динияне күтәреп чыкканда, ничек аңын югалтмады икән, дип уйлыйм. Ярый балаларым исән-сау калды, дип шөкер итәм, — ди Әлфия апа.

Кенәбаш авылын үз эченә алган Пүчинкә-Кучук авыл җирлеге башлыгы Риналь Гиниятов, гаиләгә ярдәм итәргә тырышабыз, диде.

— Янгында зыян күргән Хәлимовларны Кенәбаштагы бер буш йортка кертеп торачакбыз. Кызганыч, өйләре иминиятләштерелмәгән булган. Якын арада гаиләгә ярдәм итәргә теләүчеләр өчен банкта исәп счетын булдыру мәсьәләсе хәл ителәчәк, — диде авыл җирлеге башлыгы.

P.S. Әлфия апаның банк картасын яңарта алдылар. Гаиләгә ярдәм итәргә теләүчеләр өчен Сбербанк картасы 7-906-115-49-12 номерына беркетелгән. Әлфия Миргасимовна исемендә.

kukmor-rt.ru фотосы

Эльвира МОЗАФФАРОВА
Ирек мәйданы
№ --- | 20.07.2022