"Әле дә куркыныч төшләр күреп уянам. Атучының күзләренә карарга телибез..."

— Безгә атучының күзләренә карарга телибез. Бу хәлләрдән соң озак кына психологлар белән эшләргә туры килде. Ләкин әле дә куркыныч төшләр күреп уянам. Вафат булган сыйныфташларымны сагынып искә алам, — дигән 16 яшьлек зыян күрүче кызларның берсе “Вечерняя Казань” газетасына. Аның кулындагы җәрәхәттән калган эзләр ул мәхшәрне искә төшереп тора. Ә иң аянычы — кыз атыштан качып, 3 нче каттан сикергән һәм умыртка баганасына зыян килеп, инвалид калган. Фаҗига белән бәйле хатирәләр тынгылык бирмәгәнгә, 175 нче гимназиядә укуын дәвам итә алмаган, күчәргә мәҗбүр булган. Әлегә өйдә белем ала.

 

Тикшерү эшләре буенча, Илназ Галәвиев 2021 елның гыйнварыннан 6 маена кадәр өйдә законсыз рәвештә шартлаткыч матдәләр ясаган. 11 майда аларны 175 нче гимназиянең беренче катына, шулай ук 7 нче кабинет ишеге төбенә урнаштырган. Аннары гимназиягә ау коралы тотып килгән. Үзе белән 500 патрон булган. Кимендә 30 тапкыр аткан. Юлында кем очрый, барысына да төзәгән. Мәктәп директоры тавыш көчәйткеч аша: “Кабинетларны бикләгез”, — дип кисәтмәсә, корбаннар тагын да күбрәк булыр иде, мөгаен.

 

Зыян күрүчеләр 600 гә якын исәпләнә. Болар — укытучылар, гимназия хезмәткәрләре, укучылар, аларның әти-әниләре, туганнары. Мәктәп милкенә 1,4 миллион сумлык зыян килгән. Гаепләүче як дәвалану чыгымнары, мораль зыян өчен 15 миллион сумга кадәр акча таләп итә.

Суд утырышында катнашкан журналистлар, бу юлы Илназ нык үзгәргән иде, диде. Алгы чәчен кыска итеп кистергән, беренче тапкыр күзлек кигән. Башын гел аска иеп торган. Аңа сораулар бирергә рөхсәт итмәгәннәр. Үзе исә бернәрсәгә дә каршы килмәгән. Чик кую вакытын озайту белән дә килешкән. Башта күпләр мондый вәхшилекне эшләгән кеше психик яктан тотрыксыздыр дип уйласа да, эспертиза нәтиҗәләре Илназның үз акылында икәнен раслады. Ул бер ел сак астында. Тикшерү изоляторында камерада үзе генә. Һәрчак күзәтү астында икән.

 

Сораштырулардан бушаган арада китап укый. Туганнары белән очрашу рөхсәт ителгән. 4 апрельдән үзенең 310 томлык җинаять эше белән таныша башлаган. Әлегә 21 томны гына укырга өлгергән. Ул берничә маддә: ике, аннан да күбрәк, шул исәптән балигъ булмаган кешеләрне үтерүдә, шартлаткыч матдәләр ясауда, милеккә зыян китерүдә гаепләнә. Илназ Галәвиев гаебен тулысынча таныган. Аны гомерлеккә тимер рәшәткә артына утыртырга мөмкиннәр. Суд хөкеме быел булыр дип көтелә.

 

Әлеге фаҗигадә тагын өч кеше гаепләнә: “Ваша безопасность” компаниясе директоры, “Союз пожарного мониторинга” оешмасының янгын-сак сигнализациясе системасын ремонтлау, монтажлау буенча инженер һәм мәктәп директоры. Дөрес, алар өчесе дә гаепләрен танымый. Тикшерү эшләре дәвам итә.

 

Фото: Сергей Елагин — business-gazeta.ru