Кадер кичәсен ничек үткәрергә?

Үбәйдә ибне әс-Сәмит радыяллаһу ганһедән тапшырыла: Пәйгәмбәребез Мөхәммәд (аңа Аллаһның рәхмәте һәм сәламе булсын) безгә Кадер кичәсе турында әйтер өчен чыккан иде, ләкин ике мөселман бер-берсе белән бәхәсләшергә тотындылар, һәм ул (аңа Аллаһының сәламе булсын) әйтте: “Мин сезгә Кадер кичәсе турында хәбәр бирергә дип чыктым, ләкин болар бер-берсе белән бәхәсләштеләр, һәм миннән ул гыйлем алынды. Бәлки, сезнең өчен шулай хәерлерәк булыр. Аны (Рамазан бетүгә) егерме тугызынчы, егерме җиденче һәм егерме бишенче кичәләрдә эзләгез!” (Бохари).

 

Ягъни 21, 23, 25, 27 һәм 29нчы кичәдә булуы ихтимал. Шушы кичәләрдә аеруча күбрәк дога, истигъфар, гамәл вә гыйбадәт белән шөгыльләнү мотлак тиеш.

 

Әлеге һәм рамазан ае тәмамланыр алдыннан булучы башка төннәрдә, йокламыйча, Аллаһы Тәгаләдән ярлыкауны теләп-ялварып, намаз укып чыгалар.

 

Кадер дигән сүз кодрәт дигәнне аңлата. Икенче мәгънәсе – тәкъдир. Бу кичәдә фәрештәләр адәм баласының бер еллык тәкъдирен алып килә.

 

“Кадер кичәсе мең айдан да хәерлерәк, савабы мең ай кылган гыйбадәттән артыграк”, - диелә Коръән Кәримнең 97нче “әл-Кадер” сүрәсендә. Кадер кичәсендә Коръән Кәрим иңдерелә башлый. Коръән соңрак егерме өч ел дәвамында Җир йөзенә кисәк-кисәк иңдерелде.

 

Кадер төнен догада, гыйбадәттә, зекердә, намазда үткәргән бәндә мең ай гыйбадәт кылудан да зуррак әҗер алачактыр. Пәйгамбәребез Мөхәммәд (аңа Аллаһның рәхмәте һәм сәламе булсын) әйтә: “Кем дә кем Кадер кичәсен уяу үткәреп гыйбадәттә булса, бу кичәдән чыкканда әнисеннән туган сабый бала кебек гөнаһсыз чыгар”, – ди.

 

Бу изге кичәдә дога кылырга, намаз, Коръән Кәрим укырга, тәүбә итәргә, сәдака бирергә, үлгәннәрне искә төшерергә һәм дин кардәшләреңне шатландырырга кирәк.

 

Пәйгамбәребез Мөхәммәдтән (аңа Аллаһның рәхмәте һәм сәламе булсын) Гайшә анабыз (Аллаһ аннан разый булса иде) Кадер кичендә нинди дога укырга икәнен сорый, Аллаһның илчесе аңа бу доганы өйрәткән: “Аллааһүммә иннәкә гәфүввүн түхибүл гәфвә фәгфү гәннии” (“Аллаһым! Син гафу итүче, гафу итүне яратасың, мине гафу ит!”) (Тирмизи, Ибн Мәдҗәһ).

 

Кадер кичәсенең кайбер билгеләре: бу кич нурлы булыр, бик салкын булмас, җиләс кенә булыр, һавадан йолдызлар атылмас.

Фото: пиксабай