09.03.2022 Мәдәният

“Җитәр, дидем": артист Әминә Шәрәфетдинова театрдан бөтенләйгә киткән

Буа театрында ике дистә елга якын хезмәт куйган, күпләргә “ТНВ” каналында элек даими чыккан “Елмай шоу” тапшыруы аша яхшы таныш булган артист Әминә Шәрәфетдинова шәһәргә терәлеп үк диярлек торган Түбән Наратбаш авылында гомер итә. Ике араны нарат урманы гына аера. Әминә апа көн саен шуннан йөреп эшли иде. “Иде” дим, чөнки ул көтмәгәндә театрдан бөтенләйгә китте.

— Үземне белгәннән бирле авыл һәм район сәхнәсендә булдым, — ди Әминә апа. — Театрда да хезмәтемне яратып һәм намус белән башкардым. Күп рольләр уйнадым. Һәркайсы якын. Хезмәт кенәгәмдә ике генә эш урыны теркәлгән: балалар бакчасы һәм 19 елга якын Буа дәүләт драма театры.

— Әминә апа, театрның премьераларын күзәтеп барабыз. Соңгы вакытта сәхнәдә нишләп күренмисез дисәм... Эштән кайчанрак киттегез?

— Бу күпләр өчен көтелмәгән хәл булды кебек. Уйладым да 2020 елның 18 декабрендә гариза яздым. Директорыбыз Раил Илдар улы Садриев өч көн буе бу хакта сүз алып барды. “Артист картаймый ул”, — диде. Җыелыш та җыйды. Ул чакта өч зур спектакльдә ролем бар иде. Уйлаганмын икән, үземчә эшләдем. Киттем.

— Кыен булмадымы?

— Юк. Бер дә читен булмады. Эштән әйберләремне алып чыктым да иремә утырып киттем.

— Үпкәләп түгелдер бит?

— Юк. “Җитәр”, — дидем. Алмаш булмый тормый. Мин эшләгәндә дә, миннән соң да театрга яшьләр килеп тора. Алар шулхәтле энергияле, тырыш, сокланып карыйм. Уйнаулары, сөйләү, үз-үзләрен тотышлары бөтенләй башка төрле. “Афәрин!” — диям. Яшь хезмәттәшләремнең бер-бер артлы матур исемнәр алуына да куанам.

Гастрольләрдә матур йөрдек, Раил Садриев һәрчак шартлар тудырды, сәхнә бизәлеше, декорацияләрне куюлары гел игътибарга лаек, спектакльдә партнерлар булып уйнаганда да аның белән җиңел, рәхәт иде.

— Соңгы елларда рольләр җитәрлек идеме соң?

— Рольләр гел булып торды. Соңгы елларда “Фатыйма”, “Йорт” һәм башка премьераларда уйнадым. Балаларга булсынмы ул, өлкәннәр өчен чыгарылганмы — барысы да якын.

— Китсәгез дә, театр тормышы белән кызыксынасыздыр?

— Әлбәттә. Афишаларны күзәтәм, премьераларны карап барырга тырышам.

Лилия ЙОСЫПОВА
Ирек мәйданы
№ --- | 09.03.2022