Алия истәлеге итеп кабул итегез

11 февральдә “Бердәмлек” газетасының талантлы һәм перспективалы хәбәрчесе, бүлек мөдире булып эшләгән Алия АРСЛАНОВАның арабыздан мәңгелек йортка күчүенә бер ел тулды...

 

Алия авырып киткәндә, “Бердәмлек” редакциясе хезмәткәрләре читтән торып эшләү режимына күчкән иде инде. Ул вакытта әле ковидтан саклану чаралары, аны дәвалау ысуллары эшләнеп бетмәгән, ә вакциналар әле гамәлгә кермәгән иде. Шуңа күрә ул хастаханәдә дә эшлидер, менә-менә телефон аша берәр хәбәр җибәрер дә: “Кызлар! Мин терелдем, иртәгә - берсекөнгә шундый-шундый материалларымны җибәрермен”, - дип көткән идек. Әмма... Юк, күңел күпме генә ышанмаска тырышса да, чынбарлыкны үзгәртеп бул-мады. Алиянең вакытсыз китүе редакция хезмәткәрләре, газета укучылары, татар җәмәгатьчелеге өчен дә бик зур югалту булды.

 

Әйдәп баручы журналистны югалту редакция эшчәнлегенә нык тәэсир итте. Безнең башлар чуалган иде. Аларны тәртипкә китереп, берни дә булмагандай, дөнья мәшәкатьләрен, җәмгыять тормышын чагылдыра башлау бик кыен булды. Шулай да алга таба яшәргә, Алиянең истәлеген саклап, газетабызны бастыруны дәвам итәргә тиеш идек. Көн артыннан көннәр уза торды. Алиябез белән шәхси таныш булган яисә мәкаләләре аша белгән милләттәшләребез, “Бердәмлек”тә, татар сайтларында матур язмалар бастырып, аны искә алып тордылар. Аллаһының олы рәхмәтләре яусын барыгызга да.

 

 

Аның эш урыны әлегә кадәр буш. Ләкин, ул безнең йөрәктә. Яраткан хезмәттәшебезне искә алмыйча бер генә эш көнебез дә үтми. “Алия менә шулай әйтә иде, Алия болайрак эшләгән булыр иде”...

 

Алия “Самар татарлары” журналы һәм сайты белән дә хезмәттәшлек итте, “Туган тел” татар җәмгыяте шура әгъзасы да булып торды, үз көче белән татар балалары өчен “Шатлык” клубын оештырып, нәни милләттәшләребезне туган телебезгә якынайту, гореф-гадәтләребез белән таныштыру өчен күп көч куйган җәмәгать эшлеклесе дә, редакциянең җылы күңеле дә иде ул. Алиянең язмаларын укып барган милләттәшләребез аның искиткеч хикәяләрен дә хәтерлиләрдер әле. Алар Әминә Шиһапова псевдонимы астында бастырыла иде. Ул аларны әле редакциягә эшкә килгәнче үз яза башлаган. Кайчакта, газетадагы “Балалар почмагы”на, яисә Яңа ел номерына кызык-мәзәк мәкалә кирәк булса, ул, оялып кына, өстәл тартмасына күптән инде язып тыккан, әмма беркайда да бастырылмаган хикәясен чыгарып бирә иде. Хәзерге баш мөхәрриребез бу хикәяләрне укыган саен: “Алия, син аларны җыеп бар. Берәр кайчан, олыгайгач, җыентык итеп бастырып чыгарырсың”, - дип әйтеп килә иде. Ләкин Алиягә мәңге яшь булып калырга, ә бу хыялына озак көттермичә генә тормышка ашарга насыйп булган икән. Тик аңардан башка гына.

 

Тынгы белмәс Алиябезнең милләт үсешенә керткән өлешен, тырышлыгын искә алып, Самара өлкә “Туган тел” татар җәмгыяте президенты, өлкә “Татар эшкуарларына ярдәм итү ассоциациясе” рәисе Ильяс Гомәр улы Шәкүровның матди ярдәме белән каләмдәшебезнең “Әмин маҗаралары һәм башкалар” дип аталган хикәяләре һәм әкиятләре җыентыгы басылып чыкты. Хикәяләрне “Бердәмлек” газетасы хезмәткәрләре һәм гаиләсе җыеп туплады, ә иллюстрацияләрне Алиянең игезәк сеңелесе Лилиянең кызы Азалия Шәрәфетдинова ясады. Ул Казанның мәдәният институтында укый. Ә авылдашы, “Самар татарлары” сайты мөхәррире Римма Нуретдинова, аларны битләргә салып, типографиягә тапшырды.

 

 

“Әмин маҗаралары һәм башкалар” - Самара өлкәсендә балалар өчен татар телендә басылып чыккан беренче китап. “Аллаһы Тәгалә каләмдәшебездән – татар милләтенә зур хезмәт күрсәткән шәхестән разый булсын иде”, - диелгән китапның кереш өлешендә. Амин! Татар милләте өчен үзен аямыйча хезмәт иткән олы йөрәкле хезмәттәшебезнең җыентыгы барлык татар кешеләренең күңелендә Алиябезнең якты истәлеге булып сакланыр, дип ышанабыз.

 

Китапны укучыларга тәкъдим итү кичәсен Алиянең бакыйлыкка күчүенә бер ел тулган көнне Самараның Халыклар Дуслыгы йортында, туганнарын, якын дусларын, каләмдәшләрен җыеп уздырырга теләгән идек. Әмма Алиябезне алып киткән коронавирус зәхмәте планнарыбызга тагын чик куйды. Дөнья хәлләре яхшырып киткәч, Алияне искә алу кичәсе оештырып, китап презентациясен Самарада да, зур татар авылларында да уздырырбыз, өлкә китапханәләренә тапшырырбыз, дип өметләнәбез.

 

“Бердәмлек” газетасы хезмәткәрләре.