18.05.2021 Мәдәният

Бүген 18 майда – күренекле җырчы, Татарстанның халык артисты Габдулла Рәхимкуловның тууына 95 ел (ТАРИХИ ФОТОЛАР)

Күп кенә мәгълүмат чыганакларында Габдулла Рәхимкулов 1926 елның 15 февралендә туган дип язылган. Әмма Татар дәүләт филармониясе архивында сакланучы "Личное дело"сында ул 18 майда Татарстанның Чүпрәле районы Кече Шәйморза авылында туган дип күрсәтелә. Габдулла кечкенәдән үк җырларга ярата, мәктәптә укыганда төрле сәнгать чараларында актив катнаша.

Ул 1943 елда сугышка алына, ил чигендә хезмәт итә. 1944 елда аны Молдавиянең Измаил шәһәреннән Батумига күчерәләр һәм ул анда Хәрби җыр һәм бию ансамблендә җырлый башлый.

1950 елда ул Магнитогорск шәһәрендә училище тәмамлап, тау токымнарын шартлатучы мастер таныклыгын ала һәм шахтада эшли башлый. Ләкин җырга, сәхнәгә булган мәхәббәт аны Магнитогорскида эшләп килүче татар драма түгәрәгенә китерә, концертлар оештыруны башлап йөри.
1954 елда Казанга кайткач, Г.Рәхимкулов Татар дәүләт җыр һәм бию ансамбле хорында солист буларак үз эшчәнлеген башлап җибәрә. Бераздан ул эстрада бүлегенә күчеп, үзенең концерт төркемен оештыра.

1961 елда ул Казахстанда эшләргә чакыру ала, анда бер ел эшләгәч, аны яңадан филармониягә чакырып алалар. Җырчы үз иҗатына бик таләпчән карый, яңа җырлар өйрәнә, онытыла башлаган татар халык көйләрен репертуарына кертә. Ул татар халык җырларын, Рөстәм Яхин, Әнвәр Бакиров, Исмай Шәмсетдинов, Фасил Әхмәтов, Хөснул Вәлиуллин һәм башка композиторлар иҗат иткән җырларны оста башкара. Аның репертуарында аеруча Сара Садыйкова әсәрләре киң урын ала. Композитор аларның кайберләрен нәкь аңа махсус иҗат итә: «Бер гүзәлен сагынам чишмәнең», «Арча кичләре», «Балкый Шәйморза утлары», «Кайтыгыз торналар», «Керфегеңә тамармын мин» - шундыйлардан.

Җырчы 1979 елда лаеклы ялга чыкса да, әле тагын унбиш ел буе үзенең концерт төркеме белән республика буйлап чыгышлар ясый. 1997 елның 9 октябрендә вафат була, туган төбәге зиратында җирләнә.

Беренче рәттә (сулдан уңга): Фәхри Насретдинов, (?), Сара Садыйкова, Г. Азаматов, Разия Тимерханова. Икенче рәттә (уртада): Габдулла Рәхимкулов. Мәскәү, 1969 ел