22.03.2021 Мәдәният

Бүген Татарстанның атказанган артисты Эльба (Закирова) Шәрәфетдинованың туган көне (уникаль ФОТОЛАР)

Бүген – 22 мартта хореографик һәм оригиналь жанр артисты, Татарстанның атказанган артисты Эльба Хәбир кызы (Закирова) Шәрәфетдинованың туган көне! Күркәм юбилее белән котлап, аңа саулык-сәламәтлек, гаилә бәхете, иминлек, озын гомер телибез.

Ул үз иҗат эшчәнлеген 1968 елда Г.Тукай исемендәге Татар дәүләт филармониясендә – Татар дәүләт җыр һәм бию ансамблендә башлап җибәрә. 1969-1971 елларда бертөркем филармония артистлары белән Мәскәүгә, Бөтенроссия сәнгать студиясенә барып белемен камилләштерә. Шулай ук Казан дәүләт мәдәният университетының читтән торып уку бүлегендә («Театр коллективлары режиссеры» белгечлеге, 1979 ел) белем ала.

1971-1990 елларда ул филармониянең эстрада бүлегендә эшли. Татар эстрада сәхнәсенә ул тормыш иптәше Виктор Шәрәфетдинов белән «Цирк килде» (акробатика, жонглерлык алымнары белән), «Чәйгә чакыру» исемле пантомио биюе, М. Җәлилгә багышланган «Өзелгән җыр» биюе; Г. Тукай шигырьләре белән үрелеп баручы хореографик композиция; «Көтәм сине» тангосы, татар биюләрен һәм башка үзенчәлекле концерт номерлары әзерлиләр.

1977 елда алар Бөтенроссия эстрада артистлары конкурсында дипломант исеменә лаек булалар. Бу елларда алар Россиянең халык артисты Ренат Ибраһимов, Татарстанның халык артисты Рима Ибраһимоваларның концерт төркемнәрендә эшләп Татарстанның, Россиянең бик күп төбәкләрендә, чит ил шәһәрләрендә чыгыш ясыйлар. Шулай ук башка бик күп сәнгать осталарының концерт программаларында катнашалар.

1990 елда Эльба Закирова Казан шәһәренең нәфис гимнастика буенча 11 нче балалар мәктәбендә, 18 нче һәм 20 нче мәктәптә, Идел буе районы мәктәптән тыш үзәгендә педагог-хореограф булып эшли. Егерме елдан артык педагоглык өлкәсендә уңышлы эшләве өчен бик күп мактау кенәгәләре һәм рәхмәт хатлары белән бүләкләнә.

Алар бер кыз һәм бер малай тәрбияләп үстерәләр, инде бүгенге көндә оныкларын үстерешәләр. Уллары Айдар театр юнәлешен сайлый, Мәскәүдә М.С. Щепкин исемендәге югары театр институтын, аннары магистратураны тәмамлый. Мәскәүдә «Таганка актерлары бердәмлеге» театрында уңышлы гына эшләүче бердәнбер татар егете Айдар Шәрәфетдин кино сәнгатендә дә, эстрадада биюче буларак та катнаша.

Эльба (Закирова) Шәрәфетдинова

Эльба һәм Виктор Шәрәфетдиновлар. 70-нче еллар

Римма Ибраһимова, Эльба Шәрәфетдинова.1971 ел

«Цирк килде» номеры

Сулдан уңга: Эльба Закирова, Мөнир Мөхәммәтҗанов, Виктор Шәрәфетдинов, Нәзифә Кәримова, Татьяна Романова, Клара Хәйретдинова. СССР мәдәният хезмәткәрләре үзәк йорты янында. 1970 ел