Күченеп китәргә мәҗбүр булган авыл халкы: «Бик авыр…»

Мартыш Иштерәк авыл җирлегенә керә. Җирлек башлыгы Гөлнара Гарифуллина “ВТ” хәбәрчесенә әйтүенчә, барлыгы 11 йорт һәм ике төзелеп бетмәгән бина күчереләчәк. Бүген авыл халкы башка урыннарга күченү белән мәшгуль. Йортлар һәм җирләр Татарстан Президенты каршындагы Дәүләт торак фондына тапшырылган.

 

– Дәүләт Торак фонды 2012 елда халык белән килешү төзегән булган. 2014 елның декабрендә 91 йорт сүтелгән иде инде. Быелга кадәр авылда 13 хуҗалык кала килде, – диде Гөлнара ханым.

 

Мартыш авылында 103 хуҗалык булган. 2014 елда биредә теркәлүчеләр 55 кеше булган. Күпчелек халык – 60 яшьтән өлкәнрәкләр.

 

– Авыл зур түгел иде. Мәктәпләр, кибетләр юк иде. Дөрес, кайчандыр гөрләп торган авыл иде, әлбәттә. Монда теркәлүче кешеләргә Чаллы, Түбән Камадан фатирлардан бирделәр. Ә милек хуҗаларына компенсация түләнде. Ул акчалар кешеләрнең счетларына күчерелде инде, – диде Гөлнара Гарифуллина.

 

Тик җирлек башлыгы әлеге сумманы әйтергә теләмәде. Аның сүзләренә караганда, мөмкинлеге булганнар йортларын сүтеп алып китә, кемдер сатып җибәрә. Калганнарыныкы җир белән тигезләнәчәк…

 

– Иштерәк авылына төшүчеләр дә бар. Аулаш дигән керәшен авылына барып урнашучылар да булды. Аңа кадәр авылны калдырып чыгып китәргә мәҗбүр булган кешеләрнең кайсысы йортларының бураларын сүтеп алып китте. Калган каралты-кураларын чокыр казып, шунда күмеп куйдылар, – диде җирлек башлыгы.

 

Гомер буе яшәгән авылыннан, йорт җирләреннән кубарылып чыгып киткән халык күз алдына килде. Берсенә дә җиңел булмагандыр.

 

– Әйе, бик авыр булды… Авылның газы кергән, суы узган иде. Хәзер анда берни дә калмады, – ди Гөлнара ханым. – 2 декабрьдә суд карары нигезендә соңгы кешеләрне чыгарып, ишекләрне бикләдек. Әйберләрен ташырга гына рөхсәт бирелгән. Бүгенгә кадәр каршы килүчеләр дә бар… Тик эш алардан гына тормый инде…

Фото: chelny-biz.ru