01.10.2020 Яңа китаплар

Татарстан китап нәшрияты тәкъдим итә: кибет киштәләрендә яңа басмалар

Социаль челтәрләр безне ничек кенә үзенә җәлеп итәргә тырышмасын, китапка мәхәббәтне берсе дә җиңә алмый. Татарстан китап нәшрияты берсеннән-берсе кызыклы яңа китаплар белән сөендереп торганда, телефонны кулга аласы да килми... Бүген сезнең игътибарга нәшриятта чыккан яңа китаплар белән танышып алырга тәкъдим итәбез.

Китап сөючеләрнең күңеленә Илдус Диндаровның «Торна күзе», Галия Гайнетдинованың «Күңел – бакча», Рафаил Газизовның «Чыңлы бөртекләр», Габделбәр Галләмовның «Һәркемнең үз язмышы», Солтан Шәмсинең «Юаныч» кебек китаплары хуш килер. Аларда хәзерге заманда булган вакыйгалар сурәтләнә, актуаль сорауларга җавап эзләнә.

Әдәбиятыбыз классиклары да игътибардан читтә калмый. Шәехзада Бабичның әсәрләре тупланган китапны, Фатих Әмирхан язган «Хәят» әсәренең икенче кисәге кергән беренче китапны да нәшриятның фирма кибетләреннән алырга була.

Яшьләр өчен яшьтәшләрен уку кызык булыр. «Яңа гасыр тавышы» дигән җыентыкта хәзерге көндә билгеле авторлар иҗаты тупланган.

Нәни укучылар өчен бастырылган «Үстерә торган китап» ярдәмендә сабыйлар укырга өйрәнә, тел байлыгын арттыра ала. Монда шулай ук ел фасыллары һәм балаларның яшь үзенчәлекләрен истә тотып язылган шигъри үрнәкләр дә бирелгән. Илсөяр Иксанованың шигырьләре тупланган «Биюче бал корты» китабын да нәни дусларыбыз яратыр.

Үзегезгә ошаган теләсә кайсы китапны сез Татарстан китап нәшриятының Казандагы Декабристлар урамы, 2 йорт; Бауман урамы, 19 йорт; Бауман урамы, 51 йорт (ГУМ сәүдә үзәге, 3 кат) адреслары буенча урнашкан фирма кибетләрендә сатып ала аласыз.

---
Татарстан китап нәшрияты
№ --- | 01.10.2020