Рөстәм Гайзуллин: «Эфирга чыгуга авыз да ерыла, күз дә ачыла»

«Сираҗи сүзе» газетасында журналист Алсу Сәлахованың Татарстанның атказанган артисты Рөстәм Гайзуллин белән интервьюсы чыкты. «Күпчелек театр артистлары авыл балалары. Бу яктан сез Казан егете булуыгыз белән аерылып торасыз. Иҗатка һәм туган телгә мәхәббәтне кем сеңдергән икән?», - дип сорый журналист.

 — Мин үзем аның сәерлеген күрмими. Татар мәктәбендә, 13нче гимназиядә укыдым. Әни Сабадан, әти Балык Бистәсеннән. Балачак авылда кәҗә сөтен эчеп үтте инде. Гаиләдә мин бердәнбер бала, “псих-одиночка” дип атыйм үземне (көлә). Әти-әнинең сәнгатькә алай ук кагылышы юк инде: авылда булсам да, шәһәрдә булсам да, кичләребез әтинең баянга уйнавы, әнинең җырлавы белән уза иде. Авылда торганда бабай мәрхүм: “Эх, улым, көең юк, көең булса, баянда уйнарга өйрәтер идем мин сине”, — дия торган иде. Бабай миңа 3 яшь ярым булган вакытта үзе уйлап чыгарган такмакларны өйрәткән. Беренче хезмәт хакымны да шуларны җырлап алганмын. Авылда бер абзый мине күргән саен: “Әйдә, энем, җырла әле!” — дип, биш тиен биреп җибәрә торган булган. Әти-әни икесе дә заводта эшләгәнгә, авылга еш кайта идем. Әтием “Тасма”да, әнием пешекче булып эшли иде. Тел ягыннан, татарча сөйләшеп үстем. Әле улларым да балалар бакчасына барганчы русча сөйләшә белмиләр иде, акцентлары булды. Аннары инде өйрәнеп беттеләр… Өйдә русча сөйләшкәннәрен ишетсәм, “Малайлар! Татарча!” дип күрше бүлмәдән “тәрбияләп алам”.