05.06.2020 Шоу-бизнес

Гамил Әсхәдулла: «Концерт барган вакытта музыкантыгыз авариядә үлде, дип килеп әйттеләр»

Бүген «Татар-информ» агентлыгында татар юморына багышланган матбугат очрашуы булды. Анда Әбри Хәбриев, Гамил Әсхәдулла, Данир Сабиров, Җәвит Шакиров һәм Рифат Зарипов катнашты. Татар юмор әсәрләре язучылар арасында кытлык бар дип килештеләр, татарның зәвыгы турында да сүз күп булды. Әмма иң хисси әйберне Гамил Әсхәдулла сөйләде кебек.

“Артистның төрле вакыты була, күңеле төшкән чагы була, андый очракта сәхнәгә чыгып юмор сөйләргә ничек көч табасыз?” – дип сорады кунаклардан “Гаилә һәм мәткәп” журналы хәбәрчесе.

Бу сорауга җавап итеп “Мунча ташы” юмор театры җитәкчесе Гамил Әсхәдулла бер хәл сөйләде. Моннан күпмедер вакыт элек музыкантлары “КамАЗ” астына кереп авариядә һәлак булган. Коллективка моны концерт барган вакытта хәбәр итәләр. “Концерт барган вакытта музыкантыгыз авариядә үлде, дип килеп әйттеләр. Беренче бүлекне әйбәт кенә эшләгән идек, икенче бүлекне эшләргә бик авыр булды”, - дип искә ала Гамил абый. Артист өчен иң авыры шушыдыр, ди.

Сәхнә артында барысы да елашканнар, ә сәхнәгә чыкканда күзләренә-битләренә грим салганнар. Концерт тәмамлангач, Гамил әфәнде сәхнәгә чыгып, тамашачыга рәхмәтен әйткән һәм шушы кайгылы хәбәрне дә җиткергән. Халык “аһ” иткән. “Шундый хәл, әгәр дә икенче бүлек дәвамында уйнавыбызда берәр ни сизгән булсагыз, гафут итегез”, - дигән театр җитәкчесе. Әмма халык берни сизмәгән булса кирәк. Моны шулай икәнен соңыннан зал директоры да Гамил Әсхәдуллага килеп әйткән.

---
Матбугат.ру
№ --- | 05.06.2020