«Чыгарылыш кичәсен үткәрмәсләр - үзебез уздырабыз»

Эльвина ИДРИСОВА (11нче сыйныф укучысы): «БӘЙРӘМНӘН СОҢ ҖЫЕЛДЫК»

 

– Соңгы кыңгырау булмады дип әйтә алмыйм, чөнки ул дистанцион форматта узды. Һәрбер 9нчы һәм 11нче класс укучысы да директор, завуч һәм укытучылардан котлау һәм тәбрикләү сүзләрен кабул итеп алды. Кызганыч, моның барысы да виртуаль дөнья – компьютер аша барды. Мәктәпнең барлык чыгарылыш сыйныф укучысы да бәйрәмдә катнашты, истәлекле видеолар белән уртаклашты. Ләкин 11 ел буе укып, мондый Соңгы кыңгырау бәйрәмендә катнашырмын дип хыяллана да алмаган идем. Без бәйрәмнән соң классташлар белән җыелып, табигать кочагына чыктык. Шунда рәхәтләнеп ял иттек, сөйләштек, көлештек, елаштык. Ничек кенә булмасын, 11 ел буе иңне-иңгә куеп укыган иптәшләрең белән җыелып бәйрәм итүгә, бер-береңне тәбрикләүгә тормый мондый формат.

 

Чыгарылыш кичәсе булырмы - төгәл җавап юк. Мәктәптә бәйрәм үткәрмәсәләр, үзебез уздырачакбыз. Гомергә бер тапкыр була торган бу бәйрәмне классташлар белән бергә үткәрергә кирәк.

 

Гөлнара ӘХМӘТХАНОВА (тарих, җәмгыять белеме укытучысы): «ЧӘЧӘКЛӘР ДӘ ЮК»

 

– Мәктәптә эшләү дәверендә беренче тапкыр Соңгы кыңгырау компьютер аша чыңлады. Компьютер каршына утырып, линейка үткәрдек. Гадәти хәл түгел, билгеле. Ләкин авырлыктан чыгу юлын таба белергә кирәк. Һәр чыгарылыш класс укучысы да, үз чиратында, бәйрәмгә әзерләнгән иде – безне матур видеолар белән сөендерде. Күңелсез булса да, бәйрәм рухы бөтенләй юк иде дип әйтеп булмый. Бөтен укучы да интернет аша бәйрәм котлавы җибәрде. Узган ел бу көнне чәчәк бәйләме бүләк итәләр иде, быел булмады. Урамда да шыр-шыр көлеп, матур киемнән фотога төшеп йөргән укучылар күренми.

 

Илфар СӘЙФЕТДИНОВ (11нче класс укучысы): «ӨМЕТНЕ ӨЗМИБЕЗ»

 

– Соңгы кыңгырау бәйрәменә әзерлекне 1нче сентябрь көнне үк башлаган идек. Шул вакытта ук бу көннең ничек узачагын, нинди шигырь сөйләячәгебезне – барысын да планлаштырдык. Бер теләгебез дә чынга ашмый калды. Шигырь сөйләр урынга укытучыларның котлау сүзләрен генә тыңладык. Җанлы аралашуга чыкмый инде. Ләкин өметебезне өзмибез – чыгарылыш кичәсен матур итеп, укытучылар белән бергә мәктәптә үткәрергә өметләнәбез.

 

Гөлназ САБИРОВА (чыгарылыш класс укучысының әнисе): «МОНДЫЙ БӘЙРӘМ ТАРИХТА ГЫНА КАЛСЫН»

 

– Соңгы кыңгырау бәйрәме интернет аша булачак, дигән хәбәр килгәч, күңелдә интернетның көче җитәрме дигән зур курку яшәде. Аннары, бәйрәм «zoom» дигән платформа аша үткәрелде, ә аның вакыты чикләнгән – ярты сәгатькә генә рөхсәт бирелә. Моңа да карамастан, барысы да күтәренке рухта үтте. Теләгән һәркем чыгыш ясап өлгерде, вакытка сыешты. Әти-әниләр дә, мәктәп директоры да, класс җитәкчесе дә укучыларны котлады. Кызым Азалия җырларга да өлгерде әле. Соңгы кыңгырау бәйрәмендә барлык укучылар да форма кигән иде. Чын бәйрәм булды, кыскасы.

 

Бәйрәм беткәч, өй тирәсендә генә сеңлесе белән фотога төшеп керделәр, чөнки бу вакытны кире кайтарып булмый, ә фото истәлеккә кала. Шундый авыр чакта балалар өчен нинди дә булса бәйрәм оештыргач, ата-аналар бик шат инде. Дөньялар тынычланып, мондый форматта уку һәм бәйрәмнәр үткәрү тарихта гына калсын иде.

 

Диләрә ЗАГРИЕВА (11нче класс укучысы): «БЕЗ БУЛГАНЫННАН КАНӘГАТЬ»

 

– Соңгы кыңгырау бәйрәме бик үзенчәлекле булды, чөнки онлайн форматта узды. Мондый ситуациядә бу нормаль күренеш, бөтенләй булмаса күңелсез булыр иде. Ничек булса да, без укытучыларыбызга рәхмәтебезне белдерә алдык. Кулыма чәчәк тотып, яраткан укытучыларның күзләренә карап, теләкләремне әйтеп, чып-чын Соңгы кыңгырау бәйрәмен күрәсе килгән иде, әмма без булганыннан канәгать. Ак алъяпкыч киеп, ак бантик тагып утырдык. Виртуаль булса да, бәйрәм рухы сизелде.