24.05.2020 Җәмгыять

"Барысы да тамактан башланды" - Альбина Асылгәрәева коронавирустан ничек дәвалануы турында сөйләде

Журналист Альбина Асылгәрәеваның коронавирус йоктыруы турында мәгълүм булгач, алып баручының хәлен белешүчеләр, тизрәк савыгуын теләп язучылар күбәйгән. Альбина үзенең инстаграм битендә сәламәтлеге турында кайгыртучыларга рәхмәт әйтеп, авыруны ничек уздыруы һәм нинди дарулар белән дәвалануы хакында язма урнаштырган.

"Барысы да гади тамак авыртуыннан башланды", - ди ул. "Иртән йокыдан тамагым авыртып уяндым, тән авыртуы бик көчле иде, температурам 37-38 градуска күтәрелде. Икенче көнне инде температурам булмады. Ләкин бер көннән соң йөткерә башладым, ул да бер-ике көннән тәмамланды. Табиблар килгәч, ангина диагнозы куйдылар. Әмма берничә көннән борыным томаланды һәм башымда ниндидер сыеклык тулган кебек тойгы барлыкка килде. Аппетитым югалды һәм ис тоймый башладым.

Хәзер инде бар да яхшы дияргә була. Борында томау гына саклана, Тәм сиземләвем кайта башлады. Кәефем көннән көн яхшыра. Шулай да хәлсезлек бар, күп йоклыйм," - дип тасвирлый Альбина авыру барышын.

"Ә дәвалануга килгәндә, антибиотик, вируска каршы дарулар, тамакны һәм борынны юдырту, витаминнар һәм бик күп сыеклык кирәк. Шулай да, һәр кешенең организмы үзенчәлекле, табиб кушкан даруларны гына кулланыгыз", - дип искәртә Альбина.

Аның кичерешләре буенча, бу вирус көчле формада салкын тиеп авыруга ошаган. Ләкин озаккарак сузылуы һәм сиземләү югалуы белән аерылып тора. Альбина Асылгәрәева икенче һәм өченче тестларның уңай нәтиҗә бирәчәгенә өметләнә. Ә без аңа тизрәк савыгуын теләп калыйк.

Альбина Асылгәрәеваның коронавирус белән авырый башлавын алдарак хәбәр иткән идек.

Фото: https://www.instagram.com/p/CAfHnRAHcmQ/

---
Матбугат.ру
№ --- | 24.05.2020