Алты кешенең гомерен өзгән юл һәлакәтендә Татарстан кешесе дә булган (ФОТО)

Авария Ульяновск - Димитровград — Самара трассасында булган. Башлангыч мәгълүматларга караганда, «КИА» автомобиленең 38 яшьлек йөртүчесе алдагы машинаны узу тыелган урында каршы як полосага чыккан һәм Татарстан номеры куелган «Шевроле» машинасы (анда биш кеше булган) белән кара-каршы бәрелешкән, дип яза агентлык.

 

Нәтиҗәдә, авариядә алты кешенең: ике шофер, шулай ук «Шевроле» автомобиленең пассажирлары — 42 яшьлек хатын-кыз, 18 һәм 6 яшьлек ике кыз һәм 19 яшьлек егет (ул Татарстаннан булган) гомере өзелгән.

 

Кайбер гаммәви мәгълүмат чаралары хәбәр иткәнчә, «Шевроле»да тулы бер гаилә (ир белән хатын һәм аларның ике кызлары) һәлак булган. 19 яшьлек Татарстан егете аларның олы кызларының кияве булган, дип яза алар.

 

«Әлеге факт буенча полиция хезмәткәрләре тикшерү үткәрә, аның нәтиҗәләре буенча процессуаль карар кабул ителәчәк», - дип искәрттеләр ведомствоның матбугат хезмәтендә.