22.02.2020 Шоу-бизнес

Рамил Шарапов: "Авылларда иң күп концерт куючы артист миндер инде ул"

Рамил Шарапов Казанда тәүге тапкыр узачак концертына әзерләнә. Еллар белән җыелган иҗади "багажы", тәҗрибә белән сыналган, тамашачы мәхәббәтен яулаган юморлы чыгышлары, шаярту-мәзәкләре, җырлары әлеге концерт программасында тупланган. Яшьләр арасында "Мазда" кушаматы белән танылган, өлкәннәр күңеленә дә юл тапкан, олысын-кечесен дә авызына каратып тотучы мәзәкче, театр актёры Рамил Шарапов Татарстан районнарын, авылларын гөрләткәннән соң Казанга килә. 8нче апрельдә ул казанлыларны Ленин исемендәге мәдәният сараенда көтеп кала.

Иҗат командасында алты бөртек алар. Рамил Шарапов, юморист Рәзилә Динмөхәммәтова, Рамилнең “Кил утыр яныма” дигән җырына клипта төшкән, ике ел “Мунча ташы” эстрада театрында эшләгән артист. Башкорстан кызы – Ирина Арсланова, җырчы, юмористка. Баянчы, җырчы Алмаз Рәхимов, Рамил үзе аны “кофе три в одном” дип йөртә икән. “Татар моңы” конкурсы лауреаты, уникаль шәхес Рафаэль Якупов. Тавыш операторы – Раил Сафин.

- Рамил, концертларга тамашачы җыю мәсьәләсе сездә ничек хәл ителә? Халык йөриме концертларга?

- Менә, Аллага шөкер, талантлы иҗат төркемем белән сентябрь аенда гастрольләрне башлаган идек. Февральгә кадәр йөзгә якын концерт куйдык. Эшне башлаганда мин теләсә нинди хәлгә әзер идем. Халык килгән вакытлар да булыр, аз булган вакытлар да булыр. Утыз кеше килсә дә, куям концертны, алар бит мине хөрмәт итеп килә. Ноябрь аенда Оренбург шәһәрендә 29 кеше килгән иде! “Минуска китсәм дә, килгән тамашачымны кире бормыйм”, - дидем. Оештыручылар “концертны кичектерегез” дисәләр дә, арендалар да, кыйбат булуга карамастан,"юк" дидем. Мин бит тамашачыга хезмәт итәм. Бу юлга басканмын икән, ахыргача барачакмын.

- Казанда узачак концертның үзенчәлеге нинди? Афишада күренгәнчә, анда балалар да катнаша икән...

- Казандагы концертта иҗатташ дусларым катнашачак. “Балалы солянка” хит-парадын бергә алып баручы сәхнәдәш нәни дусларым – Ләйлә Таишева, Зәлия Зиннурова. Концертымны да алар бизиячәк. Балалары белән беррәттән Ландыш Нигъмәтҗанова, Зөлфәт Зиннуров та чыгыш ясар дип көтелә. Шулай ук тагын бер кунак – Лилия Хәмитова. Аның иҗатын балалачактан ук яратам. Арча концертында Лилия Хәмитова үзе дә бар иде. Шуңа халыкны бераз ностальгия хисенә чумдырыр өчен, Лилия апаны чакырырга булдым. Ә инде Рифат Зариповка килгәндә, без аның белән дуслар, коллегалар. Ябык ябыкны “поддержать” итәргә тиеш бит инде. Рифат берсүзсез: “Брат, мин киләм концертыңда сине “поддержать” итәргә, - диде. Иң кызыгы шул: мин драма театры артистына укыган кеше, хәзерге вакытта эстрада юморист булып йөрим. Концертта шуңа күрә сольный юмор, скетчлар, җырлы-моңлы, төрле жанрлы тамаша тәкъдим итәбез. Бер өлешендә елата торган мизгелләре дә бар, мәсәлән, “Сукыр ана” бәете белән чыгышым. Әйткәнемчә, көлкеле дә, гыйбрәтле дә, рәхәт, күңелле тамаша булачак. Аллага шөкер, зарланганнары юк.

- Башка артистлар белән чагыштырганда, авыл тамашачысы сезгә аеруча якын. Авыл мәдәният йортларында концертлар куюыгыз бик хөрмәткә лаек.

- Нигә гел авылларда концертлар куям дигәндә, дөресен әйткәндә, гади авыл тамашачысы бөтен артистны күтәргән дә инде ул. Авыл тамашачысыннан хәер-фатиха алып, Аллага шөкер, авылларда да, район үзәкләрендә дә концертларны куябыз. Мактанып әйтүем түгел, авылларда иң күп концерт куючы артист миндер инде ул. Бик рәхмәтлемен аларга. Минем беркайчан да авыл тамашачысы дип, районныкы, шәһәрнеке дип аерганым булмады. Тамашачы кайда да бер. Авылмы, шәһәрме, халык азмы-күпме, ике сәгать ярым дәвамында тулы программа куябыз. Матур гына, гөрләп концертларыбыз бара, Аллага шөкер. Хәзерге вакытта без - Азнакай якларында.

- Берничә көн элек инстаграмга куелган фотода күренгәнчә, бер апаның сезне күтәреп фотога төшүе ничек булды?

- Бөгелмә районының Кодаш авылында булды ул. Концерт ахырында, гадәттәгечә, тамашачылар фотога төшәргә киләләр. Ахырдан, бер апа килде дә: “Әй, Шарапов, үзеңне бер күтәреп алыйм әле” – ди. "Юк, сез нәрсә, авыр бит мин", дип торган арада, миңа сүз әйтергә дә бирмичә “юк күтәрәм, мин өйдә үземнең иремне күтәреп йөрим”, - дип күтәреп тә алды. Шул арада фотога да төшереп өлгерделәр.

Рәхмәт тамашачыларыма! Аллаһы Тәгалә гомеремне, елларымны күпме биргән, шулкадәр вакыт тамашачыларга хезмәт итәргә язсын иде. Бүтән һөнәрне өйрәнергә теләмим дә, шушы юлны сайлаганмын икән, ахыргача барырга насыйп булсын иде.

---
Матбугат.ру
№ --- | 19.02.2020