“Шомбай fest−2019” тәмам. “Иң яхшы артист” билгеле

Коллективлар тормыштагы проблемаларны күтәргән җитди спектакльләр алып килгәннәр.

 

“Әкият” курчак театрының татар төркеме “Җырла, курай! Уйна, Шомбай!” дигән музыкаль әкият күрсәтте. Анда халык уен коралларының яңгыравы спектакльнең бизәге булып тора. Шуңа да коллективның “Татар фольклорын популярлаштырганы өчен” төрендә бүләкләнүе очраклы түгел. Рус төркеме исә “Сказка о царе Салтане” әкияте белән чыгыш ясады һәм “Иң яхшы музыкаль бизәлеш” төренә ия булды. Тамашачы Италия курчакларын ошатып калды. Балалардан торган жюри да аларга үз бәясен бирде.

 

“Әкият” Хакас курчак театрының “Кавказский меловой круг” (Б. Брехт) драмасы күпләр өчен гыйбрәтле булуы белән аерылып тора. Спектакльнең башыннан ахырына кадәр тамашачы андагы вакыйгалар өчен борчылып утырды. Нинди генә авырлыклар кичеп булса да, сабыйны ташлап калдырмыйча, саклап калган хатын-кыз образы тетрәндерде тамашачыны. Әлеге образны тулысынча ачып биргән артист Римма Зәйнуллинаның осталыгы, җаны-тәне белән бирелеп уйнавы һәркемдә соклану уятты, хәтта күзләр яшькә төренде. Римма безнең якташыбыз да әле. Ул Казан театр училищесын тәмамлап, “Әкият” курчак театрында биш ел эшләгәннән соң, Хакасиягә күченеп китә. “ Казанга ашкынып кайттым, чөнки биредә хезмәттәшләрем белән күрешүне зарыгып көттем”,−ди Римма. Жюри аның хезмәтен бик дөрес бәяләде. Аңа “Иң яхшы артист” номинациясе дипломы тапшырылды.

 

Фестивальдә күрсәтелгән спектакльләрнең күбесе зурлар өчен иде, әмма курчак театрында балалар өчен булганнарын күбрәк күрәсе килә, чөнки алар башка театрлар өчен тамашачы тәрбияләргә тиеш. Чит төбәкләрдән килгән курчаклар арасында күңелгә ятышлылары сирәк. Үзебездәге курчакларга, аларның киемнәренә сокланырга гына кала.

 

Шунысын да әйтергә кирәк, фестивальне оештыручылар зур тырышлык куйган.

 

Тантаналы кичәнең икенче өлеше “Әкият” Татар дәүләт курчак театрының 85 еллыгына багышланды. Гомерләрен шушы театрга багышлап, хәзерге вакытта лаеклы ялда булган артистлар, башка хезмәткәрләр дә чакырылган иде кичәгә. Араларында иң өлкәне булган Татарстанның атказанган артисты Рәшидә Үтәевага 93 яшь.

 

Мәдәният министры Ирада Әюпова театрның тарихын искә алды. Курчак театры артистының катлаулы хезмәтен билгеләп үтте ул. Театр директоры Роза Җаббаровага “Татарстан Республикасы алдындагы казанышлары өчен” орденын

 

тапшырды. Театр артисты Миләүшә Фәйзрахманова “Татарстанның атказанган артисты” исеменә лаек булды. Артистлар Наталья Егорова Президентның Рәхмәт хатына, Марс Гайфуллин Премьер-министрның Рәхмәт хатларына ия булдылар. Шулай ук башка хезмәткәрләрнең хезмәте дә бәяләнде.

 

Кичә тәмамланганда театрның баш режиссеры Илгиз Зәйни: “...Бәхет өчен өеңдә барысы да тәртиптә булу кирәк. Дусларың, туганнарың яныңда булу кирәк. Бүген бөтен республика театрлары да безнең белән...Театр – минем йортым. Сәхнәдә басып торган артистлар – минем гаиләм...”, −дип белдерде.