30.09.2019 Җәмгыять

"Салават күпере"ндә яшәүчеләр Рәшит Сабировтан гафу үтенүне көтә

20 сентябрьдә Казанның Яңа Татар бистәсе зиратында татар халкының сөекле кызы, күренекле җырчы Әлфия Авзалова каберендә мемориаль композиция ачылды. Җырчыны искә алу мәрасимендә күренекле җәмәгать эшлеклеләре, танылган артистлар, язучылар, журналистлар, сәхнә ветераннары катнашты. Әмма чара тавышсыз гына узмады.

Нәфис сүз остасы Рәшит Сабиров Әлфия Авзалованың һәйкәле зиратта гына түгел, Казанның үзәгендә булырга тиеш дип чыгыш ясавы интернетта зур бәхәс куптарды. "Мөселман зиратында үзеңне шулай тотарга ярыймы?" дигән сүзләр дә ишетелде.

"Сара Садыйковага да һәйкәл куя алмадык. Гомердә бер хатын-кызга һәйкәл куйганыбыз булмады. Без хатын-кызны бөтенләй яратмыйбыз, егетләр яратабыз, ир-атларга һәйкәл куябыз. Бу – безнең бик зур кимчелек. Минем елыйсыларым килә хәтта. Мин бөтен халык алдында Кадим Нуруллинга мөрәҗәгать итәм. Хат языгыз, Рөстәм Миңнехановка, Миңтимер Шәймиевкә, Путинга языгыз. Ул хатка бөтен халык кул куячак. Милләт кызына һәйкәл куярга кирәк. Безгә оят, аның исемен шәһәр читендәге этләр генә йөри торган урамга бирделәр", - дип чыгыш ясады Рәшит Сабиров.

Исегезгә төшерәбез, Казанда Әлфия Авзалова урамы "Салават күпере" торак комплексында урнашкан. Әлбәттә, Рәшит ага бу сүзләрне Әлфия Авзалованы олылап, аның турында халык хәтерен сакларга тырышып әйткәндер. Әмма хәл көтелмәгән борылыш ала. Кичә "Матбугат.ру"га "Салават күпере"ндә яшәүче Илсөя Билалова мәрәҗәгать итте. Рәшит Сабировның сүзләренә үпкәләгән ул.

"Салават күпере" торак комплексында яшәүче буларак, артист Рәшит Сабировның "этләр генә йөри торган" сүзләре бик тә ачуымны китерде. Безнең комплекста төрле милләт һәм конфессия вәкилләре яши. Безне этләр белән чагыштыруына бик ачуыбыз чыкты. Интеллигент кеше мондый сүзләр сөйли алмый! Безне этләр белән чагыштырырга кем соң ул? Ул "Салават күпере"ндә яшәүчеләрдән гафу үтенегә тиеш!" - ди укучыбыз.

Шундый хәлләр менә.