ЭНЕМ БЕЛӘН СЕҢЛЕМНЕ ЭЗЛИМ

Хөрмәтле редакция! Туганнарымны табарга ярдәм итә алмассыз микән дип, сезгә мөрәҗәгать итәм. “Жди меня” тапшыруына да берничә тапкыр язып карадым, файдасы тимәде. Хәзер бар өметем “Татарстан яшьләре” газетасында.

Без гаиләбез белән – үги әти, әни һәм без алты бала 1951 елга кадәр Камчаткада, Елизовск районындагы 146 нчы хәрби совхозда яшәдек. 1951 елда әниебез Садыйкова Мәликә бала тапканда үлеп китте. Аңа 40 яшь иде. Әнине җирләгәннән соң үги әти – Насыйров Сабир үзенең балалары – 1946 елгы кызы Насыйрова Нәгыймәне һәм 1948 елгы улы Насыйров Шакирны алып, Татарстанга кайтып китте. Ә безне калдырды, чөнки без аның үз балалары түгел идек. Кайсы районга яки шәһәргә киткәнен дә әйтмәде. Миңа ул вакытта 10, энем Хариска – 8, апаларым Зәйнәп белән Миңнурыйга 16 һәм 18 яшь иде. Энем белән мин Украинаның Днепропетровск шәһәрендәге балалар йортында үстек. Энем 1987 елда үлде. Аның хатыны белән улы әле дә Днепропетровскида гомер итәләр. Ә мин Киев янындагы Васильков шәһәрендәге хәрби шәһәрчектә яшим (ирем хәрби иде). Гомерем буе үги әти алып киткән энем белән сеңлемне күрергә хыялланып яшәдем.

Лаеш районының Тат.Сараланы авылында минем туганнарым – Садыйковлар яши. Алар сөйләвенчә, бер кырык еллап элек ул авылга 18-20 яшьлек егет килеп, әнисе ягыннан туганнарны – Садыйковларны, ягъни безне эзләгән. Ләкин туганнарыбыз ул вакытта безнең хакта берни белмиләр иде, шуңа күрә егеткә ярдәм итә алмаганнар. Бу хакта мин әле быел гына белдем. Кызганыч, бу егет мөрәҗәгать иткән кешеләр хәзер инде исән түгел, ә аларның балалары һәм оныклары бу кешенең кайдан килгәнен дә, кайда яшәвен дә белмиләр. Шуңа күрә туганнарым миңа сезнең газетага язып карарга киңәш иттеләр, “Татарстан яшьләре” халык арасында бик популяр диделәр.

Үләр алдыннан булса да, энем белән сеңлемне табарга ярдәм итегезче. Якын кешеләрем барысы да үлеп бетте, мин ялгызым калдым. Кайдадыр энем белән сеңлем яшәгәнен искә төшергән саен йөрәгем сыкранып куя. Минем исемем Мәдинә Сафиулловна, кыз фамилиям Нуруллина, хәзергесе Вит-внукая, 1939 елгымын.

Телефоным: (04571) 641-53 Адресым: 08606, Украина, Киевская обл., г.Васильков, в/городок №11, дом 11, кв.46,Витвнукая Мадина С.