КАМАЛ ТЕАТРЫ МАТБУГАТ КОНФЕРЕНЦИЯСЕНӘ ЧАКЫРА

9 февральдә 11.00 сәгатьттә Г.Камал исемендәге Татар дәүләт Академия театрында Туфан Миңнуллинның “Диләфрүз – Remake” спектакленең премьерасына багышланган пресс-конференция һәм спектакльне журналистларга тәкъдим итү була.

Туфан Миңнуллинның “Диләфрүзгә дүрт кияү” пьесасының язмышы бәхетле булды. Танылган режиссер Марсель Сәлимҗанов 1972 елда сәхнәләштергән спектакль театр репертуарында үз урынын алып, туксанынчы еллар башына кадәр сәхнәдән төшмәде. Шат күңелле, шаян Диләфрүз һәм аның бер катлы егетләрен Камал театрының берничә буын иң популяр артистлары башкарды.

Егерме елдан артык вакыт узып китсә дә музыкаль комедиягә карата тамашачының кызыксынуы кимемәде.

Режиссер тәкъдиме белән драматург, әсәренең үзенчәлекле төп идеясен саклап, бүгенге көнгә яраклаштырып remake язарга риза булды. Бикчәнтәев рольләрне театрның популяр яшь артистларына тапшырып, сәхнә белән зал мөгамәләсенә басым ясап – тамашачыны спектакльнең тулы хокуклы катнашучысы була алырлык итеп, һәм, шул ук вакытта, комедиянең иронияле яңгырашын да көчәйтеп җырлы-биюле тамаша иҗат итте.

Көннәрдән бер көнне авылның иң чибәр кызы Диләфрүзнең рәсеме төшкән “Рlауbоу” журналы егетләр кулына килеп эләгә...