Кызыл Октябрь районы Рбишчада балаларга чын егетләр бүләге ясалды

Кызыл Октябрь районы Рбишча егетләре Хабиб, әнәс һәм Сәит Измайловлар туган авылларындагы яшь буынның сәламәт яшәү рәвешен кайгыртып, Абдулхамит Садеков исемен йөрткән Зур рбишча мәктәбе абзарында киңлеге 20, буе 40 метр булган хоккей корды төзеделәр, аңа суүткәргеч суздылар, тирәсенә баганалар утыртып, фонарьлар куйдылар һәм беренчеләрдән булып боз койдылар.

Ниһаять, үткән атнада бу хоккей мәйданчыгын тантаналы рәвештә ачтылар. Мәктәп, авыл һәм район җитәкчеләре үз чыгышларында, иң беренчедән, Измайловлар гаиләсенә рәхмәт белдерделәр. Ә Хабиб әфәнде Измайлов, үз чиратында, бертуганнары Әнәс һәм Сәит белән алга таба шушы хоккей корды янында тулы спорт мәйданчыгы төзергә планлаштырулары турында әйтте һәм аз керемле гаиләләрдә тәрбияләнгән һәм ятим булган балаларга 60 пар тимераяк та бүләк итте. Тантана кысаларында җирле мәктәп директоры вазифасын башкаручы Шәмил Мустафин белән район башлыгы Халит Сөләйманов, өлкә күләмендә ГТО нормаларын уңышлы тапшырган дистәдән артык укучыны алтын һәм көмеш билгеләр белән бүләкләделәр.

Мәктәп укучылары Россия флагын күтәргәч, Халит Сөләйманов биредә белем алучы Хадис һәм Дамир Измайловлар белән кызыл тасманы кисеп (фотода), хоккей кордын ачык дип игълан итте. Бер төркем укучылар тарафыннан боз өстендә куелган тамаша белән бәйрәм чарасының төп өлеше тәмам булды.

- Рбишчада шундый игелекле, туган авыллары өчен җан атып торучы мәрхәмәтле егетләр булуына соклануымны яшерә алмыйм. “Моны эшлим, тегене эшлим” дип, кычкырып йөрмәделәр, мөмкинлекләреннән чыгып, туган нигезләрендәге яшь буынга карата игелекле һәм олы эш башкарып куйдылар. Менә, ичмасам, чын егетләр бүләге, – дип үз фикерен белдерде Шәмил Хөсәинович.

Аннары укучылар, төркемнәргә бүленеп, мәктәпнең тренеры, билбаулар белән көрәш буенча дөнья чемпионы Ханнән Мусин һәм физкультура укытучысы Рузалия Жаронова җитәкчелегендә төрле спорт күнегүләре белән мәктәп буенча игълан ителгән Сәламәтлек көнен дәвам иттерделәр.