«INTERTAT.RU»ДА - ТУЙ!

«Intertat.ru» редакциясе тормышында шатлыклы вакыйга – газетабыз хезмәткәре Венера Фәсхетдинованы кияүгә бирдек. 10 октябрьдә Казанда Венераның сөйгәне Альберт Вәлиев белән язылышу тантанасы булды. Венераны без тыйнак холыклы, аш-суга оста уңган чын татар кызы дип беләбез. Коллективта ул һәр кеше белән уртак тел таба белә, нинди сорау белән мөрәҗәгать итсәң дә һәрвакыт ярдәм кулы сузарга әзер. Казан егете Альбертның да йөрәген Венерабыз әнә шул сыйфатлары, өстәвенә бик тә сөйкемле булуы белән яулагандыр.

“Без узган ел “Duslar.ru” сайтында таныштык. Очраша башлагач, дуслыгыбыз мәхәббәткә әверелде”, - дип сөйли Венера үзенең мәхәббәт тарихы турында. Альберт үз чиратында: “Минем ул көнгә кадәр Венера кебек кызны очратканым юк иде”, - дип серен ачты. Хезмәттәшебез булачак ирендә кулыннан бөтен эш килүен, “буш сүз” сөйләмәвен ошаткан. Гаиләдә бер генә бала булса да, Альбертның иркәләнеп утырырга яратмаганына, барлык мәсьәләләрне үз куллары белән чишәргә алынуына без дә инандык. Бөтен туй мәшәкатен, мәсәлән, кияү егете үз җилкәсенә салган иде. Инде аның гел шулай Венерабызны кайгыртып, яратып, ихтирам итеп яшәвен телибез.

Атна башыннан ук Казанда көзге яңгырлар явып торса да, Альберт белән Венераның туй көненә бүләк кебек 10 октябрь иртәсендә күктә ялтырап кояш чыкты. Кияү сөйгән кәләшен туган йортыннан татар милли йолаларына туры китереп “сатып алып” китте. Язылышу тантанасы исә каланың “Арт-эко” галереясендә үтте. Биредә яшь парның туганнары, якын дуслары җыелган иде. Балдаклар алмашканнан, вәгъдәләр куешканнан соң Венера белән Альберт биредә “гаилә учагын” кабызып җибәрде, гаиләле тормышларында беренче вальсларын башкарды. Котлаулар кабул иткәннән соң истәлеккә фотосурәтләргә төште.

Венера һәм Альберт! Алдагы гомер юлын гел шулай кулга-кул тотынышып үтегез. Бәхетле гаилә булып яшәгез, дөньяга аваз салачак балаларыгызны пар канатлы итеп үстерегез!

P.S. Туйдан фотолар “Интертат” сайтында.

P.P.S. Котлауларга «Матбугат.ru»да кушыла :)