Кызлар 56 елдан соң очрашты

Әлмәт районында яшәүче Изольда Лотфуллина-Әбсәләмова өч ел элек “Жди меня” тапшыруына дустын, хезмәттәшен эзләп хат язган. Алар Татарстанның Кызыл Йолдыз районында (бүгенге Мамадыш һәм Балык Бистәсе районнары) бер чорда эшләгәннәр. Берсе – укытучы, икенчесе комсомол райкомы секретаре була. “1960 елда Мәдинә Казанга укырга китте. Шуннан юллар аерылды”, – дип яза Изольда ханым.

Үзен эзләүләрен белгәч, Мәдинә апа бик сөенә. Шунда ук Әлмәт якларына юл тота. “Озак еллар Уфада яшәдем. Ә Әлмәттә минем бертуган сеңлем торды (хәзер вафат инде). Шуңа да бу шәһәрдә еш була идем. Изоль­даның шунда икәнен белгән булсам, күптән очрашкан булыр идек. 1960 елдан бирле күреш­кәнебез юк бит. Изольда хәзер Әлмәтнең үзендә түгел, ә Нәдер авылында яши икән. Укытучы булып та, газета редакциясендә дә эшләгән ул. Гаилә хәлләрен сөйләштек, үткәннәрне искә төшердек. Ике көн, ике төн сөйләшеп тә сүзләр бетмәде”, – дип сөйли Мәдинә апа.

 
Мәдинә апа исә “Жди меня” тапшыруының ярдәмчесе Ил­гизәр Шәрәфетдиновка бик рәхмәтле. Ул аны классташлар сайтыннан эзләп тапкан. Мәдинә апа чыннан да бик җитез кеше булып чыкты. Шунда ук редак­циянең электрон адресын язып алды, берничә минут та үтмәстән фотоларны да җибәрде. Интернетны, “ватсап”ны яхшы кулланган ападан җитезлеге турында сорашмыйча кала алмадым. Хатын-кыз­ның яшен сорамыйлар, дисәләр дә, Мәдинә апага 80 яшь бит. Хезмәт юлын башта өлкә комитетында инструктор булып эшләү­дән башлый ул. Соңыннан авиация институтында өлкән укытучы булып эшли. Шунда ул информатика фәнен укыта.

 
“Изольда белән аерылышып Казанга китүемнең сәбәбе дә югары белем алу – университетка укырга керү иде. Шунда мехмат тәмамлап кайттым мин, – дип сөйли Мәдинә апа. – Тапшыруга, Илгизәргә зур рәхмәт. Яшьлек белән кабат очрашу бит бу. Яшь чактагы фотоларга карыйм да үткәннәрне искә төшерәм. Юллар безне кемнәр белән генә очраштырмый. Күбесе белән кабат очрашып та булмый. Хәзер Изольданың үзен Уфада көтәм. Кунакка чакырдым. Ә интернетны информатика укытканда өй­рәндем. Бер генә фикерем бар: ике әби ярты гасырдан соң оч­рашып йөриләр икән дип гаҗәп­ләнмәгез. Безгә бик күңелле булды”.