Мәктәпләрдә “Селфи төшерү куркынычсызлыгы” дәресе кертмәкчеләр

Татарстанда рус милли хәрәкәте активистлары, мәктәпләрдәге татар теле сәгатьләрен күпсенеп, “файдалырак” фәннәр керсен дип йөргәндә, федераль үзәктәгеләр “Селфи төшерү куркынычсызлыгы” дип аталган яңа дәрес сәгатьләрен кертергә тәкъдим итә.

Соңгы арада кешеләр­нең селфи төшергәндә им­гәнү очраклары турында хәбәр­ләр күбәйде. Кемдер үзен фотога төшергәндә биек­лектән егылган, кемнедер елан чаккан. Белгечләр мәк­тәпләрдә кесә телефоннарына үз-үзеңне фотосу­рәткә төшерүнең аяныч нәтиҗәләргә китерү ихтима­лын аңлаткан дәрес­ләр кер­тергә кирәк, дип чаң суга. Һәрхәлдә бу сүзне “Куркынычсызлык өчен” дигән иҗтимагый хә­рәкәт вә­кил­ләре әйтә.

Бу турыда хат РФ Мәгариф министрлыгына юлланган. Дә­рес вакытында профессиональ фотографлар селфи ясау сер­ләренә өйрәтсә, психологлар белән полиция хезмәткәрләре сел­фи чиреннән котылу турында нотык сөйләячәк. Кешеләр­не, бигрәк тә балаларны алдан кисәтсәң, хә­ер­лерәк дип әйтәләр. Мондый дәресләр­не 1 сен­тябрьдән Санкт-Петербург­та уздыра башларга рөхсәт сорыйлар.

РФ Мәгариф министрлы­гының матбугат хезмәте, аерым селфи куркынычсызлыгы турында дәрес сәгате кирәк түгел, гомумән, төр­ле предметлар белән эш иткән­дә, хайваннар белән аралашканда куркынычсызлык кагыйдәләренә өй­рәтергә кирәк, дигән фи­кердә тора. Мәктәпләрдә болай да Тормыш иминлеге нигезләре укытылганын ис­кә төшер­гәннәр.

Активистлар, мәктәптә аерым дәрес булмаса да, урам, парк һәм скверларда куркынычсыз селфи кагый­дә­ләрен аңлаткан элмә такталар куелырга тиеш, ди.