“Сәләт-Самара” аланында кышкы смена узды

Алан программасы бик тыгыз итеп төзелгән иде. Төшке ашка кадәр балалар дәресләрдә булсалар, көннең икенче яртысында мастер-классларда, бәйгеләрдә катнаштылар.

 

- Биредә дәресләргә вакыт күбрәк бирелә. Шулай да балалар аларга бик теләп йөриләр. Чөнки мавыктыргыч һәм бик кызыклы итеп төзелгән дәресләрне “Яктылык” мәктәбен тәмамлап, укытучы һөнәрен үзләштерүче студентлар алып бара. Ә кичке чараларны Татарстаннан килгән әйдаманнар оештыра. Балаларга күңелсезләнергә вакыт юк, - дип сәлкешләр тормышы белән таныштырды Самараның “Яктылык” татар мәктәбенең тәрбия эшләре буенча директор урынбасары Айназ Фәхретдинов.

 

“Сәләт-Самара” аланы директоры Булат Вәлиуллин Татарстаннан көчле әйдаманнар (вожатыйлар) килүен белдерде. Наил Габдрахманов һәм Энҗе Шакирова, Равил Хәйруллин һәм Фәридә Хәйбуллова, Элина Зәйнуллина һәм Лия Шәкүрова өч төркемнең әйдаманнары, Адель Хәйретдинов - өлкән әйдаман. “Арабызда “Сәләт-Самара” аланында берничә тапкыр булучылар да бар. Балаларны, Самараны сагынып килдек”, — дип сөйли Булат Вәлиуллин.

 

Ә бер көнне “Сәләт-Самара” аланына кунакка өлкә милли-мәдәни татар автономиясе рәисе Әнвәр Горланов килде. Балалар аны “Сәләт” тормышы, төрле аланнар белән таныштырдылар. Ә мөхтәрәм кунак җирле милли оешмалар, аларның эшчәнлеге турында сөйләде, әйдаманнарның сорауларына җавап бирде.

 

- “Сәләт-Самара” аланына да өч ел тулган икән. Моның нәтиҗәләре бармы соң? - дип кызыксынды Әнвәр Имран улы.

 

- Әлбәттә! Һәр аланның нинди дә булса юнәлеше бар, балалар аннан бик күп яңалыклар, белем туплап кайталар. Мәсәлән, “Сәләт-Самара” аланы программасы балаларны белем һәм иҗат ягыннан үстерүне максат итеп куя. Әйдаманнар балалар белән тик татар телендә аралашып, сөйләм телен үстерергә ярдәм итәләр, - дип җавап бирде “Яктылык” татар мәктәбе директоры Радик Газизов.

 

 

Ә балалар, берсен-берсе бүлдерә-бүлдерә, кызыклы сәлкеш тормышы турында сөйләргә ашыктылар.

 

- Биредә бик әйбәт. Һава саф, көненә биш тапкыр хәләл ризык белән тукланабыз, җиләк-җимеш тә җитәрлек. “Яктылык” татар мәктәбе укытучылары Дания Абдрәхимова һәм Вәсимә Фәрдиева һәрвакыт безнең белән, әти-әниләребезгә борчылырга урын юк. Самара буйлап экскурсияләргә йөрдек, шәһәрнең танылган урыннары белән таныштык. Бик матур, кунакчыл шәһәр, - дип канәгатьлекләрен белдерделәр Татарстаннан килгән Камилә һәм Мәрьям Вәлиевалар.

 

- Иртәбез “турытаяк”тан (линейкадан) башлана. Анда без бер-беребезне сәламлибез, физкультура ясыйбыз. Дәресләр белән кичке чаралар арасында бераз ял итеп тә алабыз. Ләкин бөтен уебыз кичен нәрсә буласы турында. Көтеп ала алмыйбыз инде, чөнки бу - иң күңелле вакыт. Төрле уеннар, викториналарда катнашабыз, “шәмчек”ләргә җыелып, серләшәбез. Миңа дискотекалар да бик ошый, - дип сөйләде 7нче сыйныф укучысы Әдилә Хаҗиева.

 

7 мартта “Сәләт-Самара” аланының кышкы сменасы тәмамланды. Яктылыклылар әйдаманнары, яңа иптәшләре белән аерылышканда бераз күңелсезләнеп, киләсе елга да очрашырга сүз бирешеп хушлаштылар.