«ҖЫРЛАРЫМНЫ СЕЗГӘ БАГЫШЛАДЫМ»

Самараның Киров мәйданында урнашкан Литвинов исемендәге Мәдәният сараенда "Яктылык" татар мәктәбенең музыка укытучысы, татар җыры фестивальләре лауреаты, автор һәм башкаручы Линар АБСАТТАРОВның концерты булып үтте.

Тамаша башланганчы ук залда үзенә бер төрле ямь, күңеллелек хөкем сөрә, ә матур итеп бизәлгән сәхнәдән яктылык бөркелә иде.

Тәүге сольный концерты булуына карамастан, Линар Абсаттаров халыкка дулкынлануын берничек тә сиздермәде. Киресенчә, аның сәхнәдә үз-үзен чын профессионалларча тотуына исем китте минем: дистәләгән еллар буена концертлар куеп йөргән кеше диярсең үзен!

Ягымлы, сөйкемле Линар Абсаттаров тамашаның беренче мизгелләреннән үк халыкны үзенә гашыйк итте. Тамашачыларның аңа ничек кул чапканын, бихисап чәчәк бәйләмнәренә күмгәнен күрсәгез сез!

Җырчы буларак Линарның бер үзенчелекле ягы бар: ул күбесенчә үзе иҗат иткән (көйне дә, шигырьне дә үзе яза) җырларны башкара. Концертта да шундыйлардан «Самарам», «Туйга бүләк», «Лилиям», «Яшәсен Балыклым», «Кайтам әле Кызылсуыма», «Сагындым, Туплием», «Яшә игелек кылып» дип аталганнары һәм башкалар яңгырады.

Җырлар белән беррәттән «Яктылык» татар мәктәбе укучылары татар милли киемнәрдә төрледән-төрле биюләр башкардылар. Бу концертка милли колорит өстәп, аны тагын да баетып җибәрде.

Әйтергә кирәк, Линарның бөтен гаиләсе дә шундый ук талантлы икән. Концертта аның бертуган абыйсы Әнвәр синтезаторда уйнаса, моңлы тавышлы сеңелесе Римма Гәрәева җырлар башкарды. Искитәрлек гаилә: өч бертуган – өчесе дә җыр-моңга сәләтле!

Абсаттаровның концертын тулыландырып, чын музыкаль төркем булдырырга аның якын дуслары – Камышлы районының Чулпан авылында туып-үскән, бүгенге көндә Оренбург өлкәсенең Северный районында яшәүче һәвәскәр җырчы Наил Хәкимов һәм шул ук төбәктән музыкант, аккордеончы Фәрит Мифтахов булыштылар.

Дөресен генә әйткәндә, Самарада даими рәвештә концертлар куючы Татарстан артистларының тамашалары нинди рәвештә узачагын, җырчыларның сәхнәдә нинди икәнлеген без алдан ук күз алдына китерәбез инде. Ә менә Линар Абсаттаровның концерты Самараның зәвыклы тамашачысы тормышына яңа сулыш өрде, бер яңалык кертте, минемчә.

Тавышын, җырларын профессиональ дәрәҗәгә җиткерү өстендә әле күп эшлисе булса да, Линар Абсаттаров үзенең гадилеге, ихласлылыгы белән халык йөрәгендә күптән урын алды инде. Һәм, гомумән, 8 Март алдыннан үткән бу концерт хатын-кызларга чын-чынлап шәп бүләк булды.

Фотода: Линар АБСАТТАРОВ һәм аның сеңелесе Римма ГӘРӘЕВА.