ЮГАРЫ ИСЕМНӘРНЕ АКЛАРГА КИРӘК!

Самара филармониясендә милләттәшебез Ринат ИБРАҺИМОВның концертын караганнан соң туган кайбер уй-фикерләр

Алдан ук гафу үтенеп куям, укучыбыз, бу Разия ханым Әюповага бернәрсә дә, беркем дә ошамыймы икән әллә, дип әйтмәсме? Чыннан да, һәр яңа концертка билетлар сатып алгач ук, бәйрәмгә хәзерләнгән кебек әзерләнә башлыйбыз бит. Бигрәк тә Ринат Ибраһимов кебек танылган артистлар Самарага килгәндә.

Бу юлы да нәкъ шулай булды. Барлык тамашачылар – руслар да, татарлар да, башка милләт вәкилләре дә, иң матур киемнәрен киеп, ветераннар орден-медальләрен тагып, зур залны тутырганнар иде. Концерт 22 февральдә – Ватанны саклаучылар көне алдыннан үткәрелгәч, яраткан җырчыбыз да бәйрәмгә матур киенеп сәхнәгә чыгар дип өметләнгән идек.

Тик җырчы сәхнәдә күренгәч тә, күршем – башкорт газетасының мөхәррире Сәлимә ханым белән икебезнең дә кәефебез бозылды. Ринатыбыз мәктәпкә ата-аналар җыелышына барган кебек, сәхнәгә гади өс һәм аяк киеменнән, муенына галстук та, бабочка да такмыйча, килеп чыкмасынмы? Әллә рәтле итеп, шәп артистларча киенергә акчасы җитмиме икән, дип уйлап та куйдык.

Һәм ул бөтен концерт дәвамында бер үк киемдә калып, ничек сәхнәгә чыккан булса, шулай ук кереп тә китте.

Сүз дә юк, башкарган җырларының күбесе шәп булып, төрледән-төрле, татарчалары да бар иде. Берничә җырдан соң әледән-әле, сәхнәдә – Россиянең халык артисты, Татарстанның атказанган артисты, Молдованың маэстросы Ринат Ибраһимов дип, белдереп тордылар. Ә менә концертның ныклап әзерләнмәгәнлеге күренә дә, сизелә дә иде: нинди җыр башкарылачагы әйтелгәч, аның фонограммасын таба алмыйча күп интектеләр. Шундый зур, мактаулы исемнәргә лаек булган җырчыга аларны акларга тырышырга кирәк иде дә бит.

Әллә самаралылар кебек «провинциаль» тамашачыларга ничек тә ярар дип уйладымы икән Ринат туганыбыз. Югыйсә, ул гади генә артист түгел бит, Кобзон, Магомаев, Лещенко, Бегичев, Шакиров кебек мәртәбәле җырчылар рәтенә керә. Ә алар беркайчан да үзләрен болай тотмыйлар, тамашачыны гел хөрмәт итәләр иде. Исәннәре әле дә шундый мөгамәләдә калалар.

Ринатыбыз никтер аларча эшләмәде. Ул бит Салават түгел. Салаватка гына сәхнәгә ничек чыкса да, нәрсә сөйләсә дә килешә. Чөнки Салават үзебезнеке, татарныкы гына һәм аны халык һәрвакыт гафу итәчәк.

Ринат Ибраһимов кебек гомумбөтен милләтләрнеке булган артистны гафу итеп булырмы икән? Зур сәхнәгә, бигрәк тә милләттәшләребез каршына чыкканда, югары исемеңне акларлык итеп, өс киемнәреңне үтүкләп, туфлиларыңны ялтыратып, яхшы хәзерлек белән чыксаң, шәп булыр иде, дип әйтәсе килә Ринат туганыбызга.

Минем бу уй-фикерләрем, әлбәттә, чын хакыйкать була алмый. Бәлки, башкача уйлаучылар да, фикер йөртүчеләр дә бардыр.

Самара шәһәре.