"Туган як" + "Без - бергә" = гомергә

“Туган як” белән айга бер тапкыр чыга торган “Атна вакыйгалары” газетасы яңа елдан “Без – бергә” дип аталыр. Әйе, “Татарстан”, “татар” сүзе белән бу газетага яңа исем уйларга тәкъдим иткәннәр иде безгә казанлылар. Без, үз чиратыбызда, “Татарстан һәм татарлар”, “Татарстан авазы” кебегрәк исемнәрне тәкъдим итеп карадык. Һәм, мә сиңа: 5 декабрь көнне Россия төбәкләрендә чыгып килгән татар басмалары редакторларының Казанда узган еллык киңәшмәсендә (фотода) хуҗалар безгә шул исемне чыгарып салдылар.

Нигезләмәләре, беренче карашка, бик гади – төбәкләрдәге түрәләрне “Татарстан”, “татар” исемле газета белән тикмәгә сәяси сәбәпләр эзләргә этәрмәү. Ә икенчедән, һәм монысы “Без – бергә” газетасының төп максаты – Россия киңлекләрендә сибелеп яшәүче барлык татарларны берләштерү. Димәк, исеме җисеменә туры килә.

“Татмедиа” ачык акционерлык җәмгыяте бинасының конференц-залында якынча 20 төбәктән җыелган редакторларны Татарстан республикасының матбугат һәм масса-күләм коммуникацияләр агентлыгы җитәкчесе И.Җ.Миннәхмәтов җылы сәламләде.

- Хөрмәтле президент Рөстәм Миңнехановның үтенечен канәгатьләндереп, барлык татарларны берләштерә торган газетаны йөз мең данә күләмендә чыгарып һәм таратып, без Россия Федерациясендә менә шушы зур проектны тормышка ашырып киләбез. Ә якын киләчәктә яңа исем белән чит илләрдә яшәүче милләттәшләребезгә дә чыгарга исәп бар, - диде Ирек Җәүдәт улы.

Бөтендөнья татар конгрессы Башкарма комитеты рәисе Ринат Зиннур улы Закиров күбрәк татар мәктәпләре, гимназияләре турында сөйләде. “Татар газеталарында эшләүчеләр милләтебезне әйдәп баручылардан. Димәк, сез һәркайсыгыз үз төбәкләрегездә татар халкы өчен бигрәк мөһим һәм җаваплы эш башкарасыз”, - диде ул.

Милләтара мөнәсәбәтләр турында Татарстан халкының Дуслык йорты директоры И.И.Шәрипов эчтәлекле чыгыш ясады.

- Бүген Татарстанда 150дән артык милләт вәкиле яши һәм 80гә якын милли оешма эшләп килә. Алар барысы да үз эшчәнлекләрен Казанның үзәгендә урнашкан биш катлы бинада алып баралар.

Бу матур, иркен бинаны Татарстан халкына Республиканың Президенты бүләк итте. Шул рәвешле Рөстәм Миңнеханов Татарстанда яшәүче милләтләргә үзенең кадер-хөрмәтен тагын бер тапкыр ассызыклап үтте һәм башка төбәкләрдә яшәүче татарларга да урыннарда менә шундый шартлар тудырылсын иде, дип үрнәк күрсәтте.

Хөрмәтле кунакларыбыз, сез җитәкләгән газеталарны да бит милли оешмаларга тиңләргә мөмкин. Чөнки никадәр тиражыгыз бар, димәк, шул кадәр кешене сез берләштерәсез, алар арасында иҗтимагый фикер тудырасыз, бергәләп мөһим проблемаларны хәл итәсез. Әлбәттә, эшегез үтә катлаулы, үтә җаваплы. Шуңа күрә хезмәтегездә уңышлар телим һәм татар милләтен берләштерүгә көчегез булып торсын, алга барырга ният-теләкләрегез бер дә сүнмәсен иде, - дип тәмамлады сүзен Ирек Илдусович.

Татарстан Республикасы Дәүләт Советы депутаты, “Татмедиа” ачык акционерлык җәмгыяте генераль директоры киңәшчесе Ислам Галиәхмәт улы Әхмәтҗанов чит төбәкләрдә чыгып килгән газеталар һәм аларның редакторлары турында бөтен белешмәләрне бер җыентыкка тупларга кирәк диде. “Ул безнең дуслыкны тагын да ныгыта төшәр һәм татар матбугатының, журналистикасының тагын бер тарихи сәхифәсе язылыр иде. “Татмедиа”ның төбәкләргә чыгып, андагы газеталарның эшләре һәм эшчәнлеге белән якыннан танышу, тәҗрибә уртаклашу планы да бар, “Без – бергә” газетасын айга ике тапкыр чыгарырга да ниятләнәбез. Һәм шундый яшь команда белән без барысын да булдырырбыз, Алла боерса”, - диде тәҗрибәле журналист һәм абруйлы җәмәгать эшлеклесе Ислам абый.

“Татмедиа” ачык акционерлык җәмгыяте генераль директоры Ф.И.Шагиәхмәтов киләчәктә җирле газеталарның әһәмияте һәм дәрәҗәләре үсүе турында түбәндәгене белдерде:

- Белгәнегезчә, Россиядә цифралы телевидение гамәлгә керә бара. Моның уңай якларыннан тыш, тискәре яклары да шактый. Шуларның иң борчыганы - урыннарда, шул исәптә регион һәм милли республика телетапшыруларына, җирле район телевидениеләренә эфирга чыгу мөмкинлеге ябыла. Ә 2018 елда аналог телетапшырулар бөтенләй туктатылыр һәм без район, өлкә, республика телевидениеләрен караудан мәхрүм ителәчәкбез. Менә шунда җирле газеталарга сорау кискен артачак, чөнки яңалыкларны халыкка бары тик җирле басмалар гына җиткерә алачак. Җирле хакимият белән халык арасындагы мөнәсәбәтләрне урнаштыру да район, өлкә газеталарына йөкләнәчәк, - диде Фәрит Илдус улы.

Әйе, инде бүген телевизорларын “тәлинкә”гә тоташтырган яисә “цифрага” күчергән милләттәшләребез Сергач телевидениесе аша туган көннәргә яңгыраган татарча ял концертларын карый алмый, өлкә телеканалларыннан да хәбәрдар түгелләр. Югарыда әйткәннәрнең бу бер мисалы гына.

Моңа кадәр “Атна вакыйгалары”, ә яңа елдан “Без – бергә” газетасы редакторы М.Г.Мортазин Казанда әзерләнеп Россия төбәкләренә тарала торган газетаның эчтәлеге һәм киләчәге турында сөйләде.

- Бүген Казан “бүләге” 21 төбәктә чыгып килгән газеталарга кушылып дөнья күрә. Башкортостанда атнага биш тапкыр чыккан “Кызыл таң” газетасы безнең “күчтәнәч”не алдыра башлагач, “Без – бергә” газетасының гомуми тиражы йөз меңне узып китәчәк. Даими рәвештә без аның эчтәлеген баету өстендә эшлибез, киң катлам укучыларны истә тотып, тематикасын киңәйтергә тырышабыз. Сезнең теләктәшлекне, Президентыбызның ярдәмен тоеп эшләгәндә без авырлыкларны сизмибез дә,- диде Мансур Газизҗан улы.

Тәҗрибә уртаклашу йөзеннән чыгып, Ульяновск өлкәсе татарларының “Өмет” газетасы редакторы Исхак Хасибулла улы Халимов һәм шул ук өлкәдән “Ленинец” газетасы редакторы Владимир Константинович Кузьмин сүз тоттылар. Аннары К.Октябрь районының “Авылым хәбәрләре”н 15 еллыгы, ә Омск шәһәренең “Татар дөньясы”н 10 еллыгы белән Ирек Миннәхмәтов тәбрикләде һәм бүләкләде. Шуннан соң килешүләр төзедек һәм төшке аштан соң яңарган Казан буйлап экскурсиягә киттек.

Универсиадага махсус төзелгән матур шәһәрчекне карап чыктык. Хәзер анда студентлар яши һәм тәртип саклый. Каюм Насыйри урамы буйлап яңартылган “Иске татар бистәсе”ндәге агач йортларга сокланып йөрдек, антиквар самоварлар кибетендә булдык һәм “Казан Арена” белән таныштык. Шиһабетдин Мәрҗәни йортын һәм мәчетен күрдек, Хайдәр Бигичев яшәгән күп катлы таш йорт янында булдык...

Кыскасы, кичке аш белән “Султанат” ресторанында сыйланып, бер-беребезгә зур уңышлар, иҗади дәрт, яңа күрешүләр теләп таралыштык.