ӘСГАТЬ АБЫЙ ҮЛЕМНӘН КОТКАРДЫ

30 декабрьдә танылган мәрхәмәт иясе, иганәче Әсгать ага Галимҗанов тагын бер яхшылык эшләде. Ул Казахстаннан күчеп кайтып, яшәргә урыннары булмаган, сиксән яшькә якынлашып килүче Наилә һәм Габдулла Һадиевларны Татарстан урамындагы фатирына вакытлыча, җәйгә чыкканчыга кадәр яшәргә кертте. Наилә Әкбәр кызы, беренче группа инвалид, ике аягы да киселгән, сукыр. Чөнки ул күптәннән инде шикәр авыруы белән газап чигә икән.

Наилә ханым тумышы белән Саба районының Сатыш авылыннан. Ә ире Габдулла абый Мамадыш районының Югары Сөн авылыннан. Алар, яшь чакларында бәхет эзләп, Казахстан якларына китеп барган. Монда кем булып кына бил бөкмәгәннәр, төрле эшләрдә газап чиккәннәр. Авыл җирендә, совхозда, салкын өйләрдә яшәгәннәр. Бер совхоздан икенчесенәдә күченеп караганнар. Гел туган якларына кайту турында хыялланганнар. Тугыз баланы тәрбияләп аякка бастырганнар. Рушания һәм Раилә исемле кызлары күптәннән Казанда яши икән. Алар Ленинград урамындагы тулай торакта өч бала белән 19 кв метрлы бүлмәдә тора. Рушания эше буенча ничектер Әсгать абый белән танышып китә. Ул аңа әти-әнисенең авыр хәле турында сөйли. "Казанга кайтсыннар, ярдәм итәрмен", – ди Әсгать абый.

Моннан бер ай элек Наилә ханым белән Габдулла абый Казанга кайтып төшкән. Аларны Әсгать абый яхшы иттереп каршы алган, матди ярдәм күрсәткән. Алар кызлары янында тулай торакка урнашкан.

– Бүлмәдә кеше күп, эссе, йөрергә дә урын юк иде. Инде соңгы минутларым җитте дип уйлаган идем. Әсгать үз фатирына вакытлыча яшәргә кертеп, мине үлемнән коткарды. Аңа Аллаһының рәхмәтләре яусын. Хәзер үземне оҗмахтагы кебек хис итәм, дарулар алырга акчам гына җитсен инде, инсулинсыз бер генә көн дә яши алмыйм, – ди Наилә апа.

– Өчәр катлы коттеджлар, берничә фатиры, бакчасы булган кешеләр күп бит. Нигәдер алар мохтаҗларга ярдәм итәргә ашыкмый, мин исә кешеләргә булышсам, алардан рәхмәт ишетсәм, күңелемә тынычлык алам, – ди Әсгать ага.