Изге Болгар җире 50 мең кунак кабул итәргә җыена

Әби-бабаларыбыз ислам динен кабул иткән көнне билгеләп үтү максатыннан, менә инде күп еллар рәттән Болгарда «Изге Болгар җыены» уздырыла. Гадәттә, бәйрәм июнь аенда оештырыла иде. Быелгы чараны исә ислам кабул итүнең рәсми датасына якынайтып, 25 май көнне үткәрергә булганнар.

Болгар музей-тыюлыгында бу көнне 50 меңгә якын кунак көтәләр. Хөкүмәт йортында узган матбугат очрашуында Спас районы башлыгы урынбасары Мансур Гыйматдинов һәм Татарстан Мәдәният министрының беренче урынбасары Ирада Әюпова быелгы бәйрәмнең үзенчәлекләре һәм төп чаралар турында сөйләде.

25 май көнне Болгарда яңа Елга вокзалының тантаналы ачылышы көтелә. 5 мең квадрат метрлы җирлектә Болгар цивилизациясе музее урнашачак. Шулай ук кунаклар өчен зур мәдәни программа әзерләнгән. Бәйрәм мәйданында мөнәҗәтләр, борынгы татар җырлары яңгыраячак, Корьән укучылар чыгыш ясаячак. Сувенир һәм халык кул эшләнмәләре, хәләл продукция, дини товарлар сатуны да җәелдерү ниятләнә.

Җыенга җомга көн кич килүчеләр өчен 2 мең урынлык палаткалы лагерь эшлиячәк. Мансур Гыйматдинов әйтеп киткәнчә, анда туристларның уңайлы урнашуы өчен шактый яхшы гына шартлар тудыру турында кайгыртканнар. Хәтта кайнар ризык әзерләп, тамак ялгап җибәрү өчен дә мөмкинлек булачак. 4-6 кешегә исәпләнгән палаткаларда исә ятак-караватлар куелачак, матраслар, урын-җир җәймәләре биреләчәк.

Казаннан Изге Болгар җыенына бару өчен рейс автобуслары санын арттырырга булганнар. Шулай ук мөселманнар Казанның төп мәчетләреннән махсус туристик автобусларга да утырып китә алачак.