Республиканың каләм ияләре Медиафорумда катнаша

16-17 май көннәрендә Казанда Медиафорум уздырыла. Аның кысаларында төрле танылган шәхесләр катнашында берсеннән-берсе кызыклырак чаралар үткәрү каралган. Ул республиканың барлык массакүләм мәгълүмат чаралары вәкилләрен җыячак.

16 май көнне журналистлар белән Татарстанның Дәүләт Советы рәисе Фәрит Мөхәммәтшин очраша. Шул ук көнне сәгать 14:00 дә «Татар-информ» мәгълүмат агентлыгы фойесында «Интерфакс» компаниясенең генераль директоры урынбасары Николай Касьянов «Җирле яңалыкны федераль дәрҗәдә үткәрү» дигән темага семинар уздыра. Теләге булганнар исә икенче шундый ук чара — Медиаиндустрия Академиясенең интернет һәм радиожурналистика кафедрасы җитәкчесе Кипрас Мажейка тарафыннан үткәреләчәк семинарга рәхим итә ала.

Медиафорумның икенче көне кызыклы чараларга аеруча бай булачак. Журналистлар BBC WorldNews компаниясенең Россия һәм Евразиядәге вәкиле Сергей Становкин тарафыннан уздырылачак яңалыклар белән эшләү кагыйдәләренә багышланган семинарда катнашачак. Татарстан милли китапханәсендә исә «Аргамак.Татарстан» әдәби журналы түгәрәк өстәл үткәрә. Анда Татарстанның халык язучысы, Дәүләт Советы депутаты Разил Вәлиев, Татарстан язучылар берлеге рәисе Рафис Корбанов, Татарстанның иҗтимагый палата рәисе Анатолий Фомин һәм башка рәсми затлар катнашыр, дип көтелә.

Медиафорумның иң тантаналы вакыйгасы исә - «Бәллүр каләм» республикакүләм бәйгесенә йомгак ясау, җиңүчеләрне бүләкләү чарасы. Әлеге чара 17 май көнне «Пирамида» концертлар һәм күңел ачу залында узачак.