KAMAZ.RU ӨЧЕН КӨРӘШ

Интернетта доменнар сатып акча эшләүчеләрне киберсквоттерлар диләр. Шушы көннәрдә “КамАЗ” ачык акционерлык җәмгыяте шундый кешегә каршы суд эшен отты. Моңарчы “КамАЗ” заводы kamaz.net домены белән чикләнергә мәҗбүр иде. Әлбәттә, kamaz.ru отышлырак. Әмма анысы 1999 елда ук Волгоград кешесе Николай Попков исеменә теркәлгән булган.

Завод җитәкчелеге Попковка доменны сорап мөрәҗәгать итә, килешә алмагач, аны судка бирә. Суд эшләре бик озак бара һәм менә күптән түгел Саратов арбитраж суды доменны “КамАЗ”га кайтарырга дигән карар чыгара. Шуның өстенә, Попков заводка 105 мең сум компенсация һәм 25 меңлек суд чыгымнарын түләргә тиеш. Ни өчен завод доменны судлашмыча гына сатып алмаган? Попков зур сумма сораганмы? Әллә “КамАЗ” үзенең принципиальлеген күрсәтергә теләгәнме? Монысы билгесез. Бер яктан, якташларыбыз өчен шатланыргадыр. Икенче яктан, ничек инде кешедән аның милкен тартып алып була? Хәер, суд материаллары белән таныш булмагач, нинди дә булса фикергә килүе кыен.  

P.S. Шундый ук проблема белән “АвтоВАЗ” һәм “ЗИЛ” заводлары көрәшә. Аларның максатлары – lada.ru һәм zil.ru адресларына ия булу.